Thirrja e Tatimeve për bizneset: Ndjekje penale nëse bëni këto dy shkelje

Drejtoria e Përgjithshme e Tatimeve (DPT) paralajmëroi bizneset se, nëse ndryshojnë me ulje deklaratën e listëpagesës dhe anulojnë faturat e shitjes pa u reflektuar në librat e blerjes do të ndiqen penalisht.

Në njoftimin zyrtar DPT thotë se Administrata Tatimore po investigon nëse të përfshirë janë edhe punonjës të strukturave të saj.

Administrata Tatimore njofton të gjithë Tatimpaguesit se ka konstatuar dy fenomene me risk të lartë:

1-            Tatimpagues, që bëjnë ndryshime me ulje të deklaratës së listëpagesës, me qëllim shmangien e pagesës së kontributeve të sigurimeve shoqërore dhe shëndetësore për punëmarrësit;

2-            Tatimpagues, që anullojnë faturat e deklaruara të shitjes, pa u reflektuar këto anullime në Librat e Blerjes së klientëve të tyre.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

“U bëjmë të ditur të gjithë tatimpaguesit se këto ndryshime të pajustifikuara të deklaratave, kryesisht ndryshimi i deklaratës së listpagesës, cenojnë drejtpërdrejt jo vetëm Administratën Tatimore, por edhe Pensionin dhe Shërbimet Mjekësore të punëmarrësit dhe në bazë të ligjit konsiderohet vepër penale”, sqaron Administrata Tatimore.

Administrata Tatimore thekson gjithashtu se po investigon nëse të përfshirë në këto fenomene janë edhe punonjës të strukturave të saj, ndërsa sjell në vëmendje të tyre dhe të çdo tatimpaguesi që fenomenet e sipërcituara do të trajtohen sipas ligjit “Për Procedurat Tatimore”.