LIGJET E BIZNESIT
Pagat në ekonominë shqiptare janë rritur. Instituti I Statistikave konstaton se në tremujorin e tretë të këtij viti, paga mesatare mujore bruto arriti në 61,613 lekë, duke shënuar një rritje prej 9,2% kundrejt të njëjtës periudhë të një viti më parë. Nga të dhënat rezulton se rritja më e ndjeshme e pagave është konstatuar në bujqësi, shërbime dhe turizëm. këta janë sektorët që po vuajnë dhe më shumë nga largimi i fuqisë punëtore, duke detyruar dhënien e pagave më të larta për punonjësit ekzistues.
Krahasuar me të njëjtin tremujor të vitit të kaluar, gjatë tremujorit të tretë 2022, paga mesatare bruto për aktivitetin e Bujqësisë, pyjeve dhe peshkimit, ka rritjen më të madhe prej 15,7%, e ndjekur nga tregtia; transporti; aktivitetet e akomodimit dhe shërbimit ushqimor, me 13.7%, ndërtimi me 13%, industria me 11%.
Ndërsa rritjen më të vogël e ka grup aktiviteti i administratës publike dhe mbrojtjës; sigurimi social i detyrueshëm; arsimi; shëndetësia dhe aktivitete të punës sociale prej 5%.
Sektorët me pagat më të larta
INSTAT konstaton se pagat më të larta në Shqipëri I kanë të punësuarit në sistemin financiar. Kështu, gjatë tremujorit të tretë 2022, paga mesatare mujore bruto për një të punësuar me pagë në sektorin e Aktiviteteve financiare dhe të sigurimit është 93,4% më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim është 33,1% më e ulët.
Një i punësuar në banka apo sigurime ka një pagë mesatare 119 mijë lekë, ose gati 10% më shumë se në tremujorin e tretë të një viti më parë. Megjithatë, në raport me tremujorin e dytë 2022, kur arriti rekordin prej 130 mijë lekësh, paga mesatare në këtë grup aktivitet ka rënë me 9%.
Grup aktiviteti i dytë me pagën më të lartë është “Informacioni dhe komunikacioni”, me pagë mesatare 94 mijë lekë.
E treta më e paguara është Administrata publike dhe mbrojtja; sigurimi social i detyrueshëm; arsimi; shëndetësia dhe aktivitete të punës sociale, me 71 mijë lekë në muaj.
Sipas INSTAT, gjatë tremujorit të tretë 2022, paga mesatare mujore bruto, për një të punësuar në grup-profesionin e Manaxherëve, Ligjvënësve, nëpunësve të lartë të administratës shtetërore dhe drejtorëve ekzekutivë është 62,7% më e lartë sesa mesatarja në nivel kombëtar, ndërsa në grupin e Punëtorëve (Profesione elementare) është 36% më e ulët.
Krahasuar me të njëjtin tremujor të vitit të kaluar, gjatë tremujorit të tretë 2022, paga mesatare mujore bruto në Forcat e Armatosura ka rritjen më të madhe prej 18,5%, ndërsa rritjen më të vogël e ka grup-profesioni i Manaxherëve, Ligjvënësve, nëpunësve të lartë të administratës shtetërore dhe drejtorëve ekzekutivë 4,5%.
