LIGJET E BIZNESIT
Ngadalësimi i rritjes së eksporteve ka vijuar edhe në nëntor, duke ndjekur trendin disa mujor tashmë. Faktorët që po ndikojnë janë pasojat e krizës globale, kostot e larta të energjisë, si dhe ndërprerja e përkohshme të aktivitetit nga dy sipërmarrje të mëdha, Kurum dhe Albchrome.
Sipas të dhënave të Institutit të Statistikave, në nëntor eksportet u rritën me vetëm 12.9% kundrejt të njëjtës periudhë të një viti më parë. Në tetor rritja ishte 12.5% dhe në shtator shifra ishte 16.3%. Ndërkohë që të dhënat zyrtare tregojnë se në muajt e parë të vitit zgjerimi mujor i eksporteve ishte rreth 50%.
Peshën kryesore në rritjen e eksporteve në nëntor vijuan ta mbanin tekstilet e këpucët, ndërsa për të tretin muaj ishin me tkurrje shitjet e materialeve të ndërtimit e metaleve, që deri tani kishin qenë një nga nxitësit kryesorë të eksporteve.
Në nëntor u përshpejtua rritja e eksporteve të mineraleve, lëndëve djegëse dhe energjisë, e ndikuar nga moti i favorshëm me reshje, që ka nxitur shitjen e energjisë jashtë vendit.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Sipas INSTAT, në nëntor 2022 eksportet e mallrave arritën vlerën 42 miliardë lekë, duke u rritur me 12.9%, në krahasim me të njëjtën periudhë të një viti më parë dhe me 10.2%, në krahasim me tetor 2022.
Si periudhë 11-mujore, eksportet e mallrave arritën vlerën 447 miliardë lekë, duke u rritur me 32.6%, nga 35% që kishte qenë zgjerimi për 10 mujorin.
Sipas INSTAT, gjatë muajit nëntor, në rritjen e eksporteve prej 12.9%, pozitivisht kanë ndikuar grupet: “Minerale, lëndë djegëse dhe energji elektrike” me +6.2 %, “Tekstile dhe këpucë” me +5.5 %, “Makineri, pajisje dhe pjesë këmbimi” me +3 %. Ndërsa negativisht ka ndikuar grupi: “Materiale ndërtimi dhe metale” me -4.7 %.
Për 11 mujorin, grupet që kanë ndikuar pozitivisht në rritjen vjetore të eksporteve, janë: “Minerale, lëndë djegëse dhe energji elektrike” me +9.7 %, “Materiale ndërtimi dhe metale” me +7.7 %, dhe “Tekstile dhe këpucë” me 6.5 %.
