Fasha 800 kilovat orë për konsumatorët familjarë nuk do të hyjë në fuqi nga 1 tetori. Qeveria është tërhequr nga vendimi dhe këtë e ka bërë të ditur kryeministri Edi Rama me anë të një videoje në facebook.
“Sot kam një lajm pozitiv: më 1 shtator, kur vendosëm fashën, kërkesa për energji nga KESH ishte 17000KË, sot është 11000KË. Atëherë, kërkesa ishte ndjeshëm më e lartë dhe pa diskutim në këtë ulje ka luajtur rol të rëndësishëm edhe fillimi i dukshëm i kursimit nga abonentët familjarë. Kemi pasur edhe përmirësim të nivelit në Fierzë dhe presim reshje të tjera në tetor. Në këto kushte, bazuar në analiza të detajuara, vendosëm që aplikimi i fashës 800KË të mos hyjë në fuqi në muajin tetor”, tha kryeministri.
“Fasha synon që 4% e abonentëve që e tejkalojnë këtë kufi dhe konsumojnë afro 20% të gjithë sasisë së energjisë, të paguajnë me çmimin real çdo kiloëat mbi kufirin e 800KË. Nuk është shpikje e jona, por një metodë e aplikuar nga shumë vende për të kursyer në këtë kohë të zymtuar nga inflacioni i luftës. Kursimi është arma kryesore për ta kaluar këtë dimër pa kufizime energjie”, nënvizoi Rama, i cili më tej shtoi se qeveria “nuk do të lërë gjë pa bërë që barra faktike e kësaj lufte, të lehtësohet sa më shumë”, deklaroi kryeministri.
Çmimi për abonentët familjarë momentalisht është 9,5 lekë për kilovat orë, ndërsa çmimi i vendosur për çdo kilovatorë mbi fashën 800 këh është 42 lek (pa TVSH).
