Takimet në Tiranë për buxhetimin gjinor, Shqipëria ndër vendet me performancën më të lartë në rajon

Shqipëria është një ndër vendet e rajonit me përformancën më të lartë sa i përket buxhetimit mbi bazë gjinore. Me qëllim shkëmbimin e kësaj përvoje të suksesshme në Ministrinë e Financave u zhvilluan takime disa ditore me një delegacion të nivelit të lartë të Turqisë, të kryesuar nga Kryetarja e Komisionit për Mundësi të Barabarta për Gratë dhe Burrat, Fatma Aksal dhe Kryetari i Komisioni të Planit dhe Buxhetit, Cevdet Yilmaz në Asamblenë Kombëtare të Turqisë, së bashku me Përfaqësuesin e Përhershëm të UN Women në Shqipëri, Michele Ribotta.

“Theksuam rëndësinë e forcimit të bashkëpunimit mes dy vendeve tona në menaxhimin buxhetor, për të adresuar drejt çështjet e pabarazisë gjinore në nivel qendror dhe vendor”, u shpreh ministrja e Financave dhe Ekonomisë, Delina Ibrahimaj.

Interes i veçantë u tregua për përvojën tonë në hartimin dhe funksionimin e sistemeve informatike për Planifikimin Strategjik (IPSIS) dhe atë të Menaxhimit Financiar (AFMIS) që u vlerësuan si risi në zbatimin e politikave me bazë gjinore.

Aktualisht, Shqipëria zbaton 45 programe sipas parimeve të buxhetimit të përgjigjshëm gjinor, ndërsa shpenzimet për zbatimin e këtyre politikave përbëjnë rreth 9% të totalit të shpenzimeve vjetore, shifër që ka ardhur në rritje të vazhdueshme.