Rritja e çmimeve të ushqimeve dhe karburanteve ka rritur eksportet shqiptare. Sipas të dhënave të Institutit të Statistikave, në gusht eksportet e mallrave arritën vlerën 35 miliardë lekë, duke u rritur me 48.1 % kundrejt të njëjtës periudhë të një viti më pare. Statistikat e detajuara tregojnë se kontributin kryesor në këtë performancë e kanë dhënë nafta, materialet e ndërtimit e metalet.
Si periudhë 8 mujore, eksportet e mallrave arritën vlerën 328 miliardë lekë, duke u rritur me 41 %, të ndikuara nga grupet “Materiale ndërtimi, metale, minerale, lëndë djegëse, energji”, si dhe “Tekstile dhe këpucë”. Në pjesën më të madhe, sidomos për lëndët djegëse dhe materialet e ndërtimit dhe metalet, tendenca është ndikuar në pjesën më të madhe nga shtrenjtimi i çmimeve
Përsa i përket partnerëve tregtarë, 59.7% e totalit të tregtisë zhvillohet me vendet e Bashkimit Europian. Partnerët kryesorë tregtarë janë Italia me 29.8 % të totalit të shkëmbimeve, Turqia me 8.1 %, Greqia me 7.1 % dhe Gjermania me 6.3 % të totalit të shkëmbimeve tregtare.
