LIGJET E BIZNESIT
Qeveria ka marrë vendim në mbledhjen e sotme që të rrisë me 9.5% pensionet dhe të rrisë pagën minimale në 34 mijë lekë. Ka qenë ministrja e Financave dhe Ekonomisë, Delina Ibrahimaj që pas mbledhjes së Këhsillit të Ministrave ka shpjeguar ndikimin tek qytetarët.
“Me këtë indeksim të dytë ne e çojmë rritjen e pensioneve në nivelin 9.5% në krahasim me pasionet që merreshin në fund të vitit të kaluar. Përfitojnë 678 mijë pensionistë. Ky vendim hyn në efekt që me pensionin e muajit shtator.
Morëm një vendim sa si përket rritjes së pagës minimale në shkallë vendi. Në prill, e rritën nga 30 mijë në 32 mijë. Me vendimin e sotëm paga do të jetë 34 mijë lekë dhe ky është një vendim që prek 200 mijë të punësuar. Në total kemi rreth 900 mijë qytetarë shqiptare që përfitojnë nga rritja e pensioneve dhe pagave”, tha Ibrahimaj.
Ministrja e Financave iu përgjigj interesit të medias lidhur me kohëzgjatjen e funksionimit të bordeve për karburantet dhe produktet ushqimore.
“Kemi marrë një vendim sapo lufta filloi dhe sapo çmimet filluan të rriten, ne kemi vendosur që jemi një qeveri që mbështet tregun e lirë dhe jo ndërhyrjet në përcaktimin e çmimeve. Ndaj vendosëm që të formojmë këto dy borde, të cilat kanë bërë punën e tyre dhe limitimin e çmimeve, pa ndikuar në rritjen e çmimeve. Ne do të vazhdojmë të mbajmë bordet për karburantet dhe ushqimet, përsa kohë do ndikohemi nga rritje eksponenciale e çmimeve ndërkombëtare me qëllim garantimin që qytetarët të paguajnë çmimin më të ulët të mundshëm dhe limitim të spekulimeve me çmimet”, deklaroi ministrja.
Rritja e pagës minimale dhe pensioneve janë pjesë e Paketës së dytë të Ndihmës për përballimin e krizës së çmimeve, bërë publike pak ditë më parë nga qeveria.
