Të gjitha ndërtimet dhe shtesat pa leje do të konfiskohen dhe do t”iu jepen qytetarëve që do të shpronësohen për interes publik. Është ky vendimi që ka marrë sot qeveria. Zv.kryeministrja Belinda Balluku deklaroi se krahas kësaj mase, do të ketë një hetim për të gjitha institucionet që kanë detyrë kontrollin e territorit.
“VKM-ja ka të bëjë me të gjitha ndërtesat pa leje në Republikën e Shqipërisë ose për shtesat e bëra pa leje. Një trend shumë i zhvilluar. Pavarësisht që janë projektuar me shtatë kate, shtohen kate të tjera duke shpresuar në legalizim. Këto struktura do të jepen për përdorim publik, si kompensim i atyre qytetarëve që preken nga projektet publike”, deklaroi Balluku.
Sipas saj, i gjithë procesi, “i gjatë dhe i bazuar në ligj”, ka si objektiv dekurajimin e kompanive ndërtuese. Ministrja njoftoi se krahas kësaj iniciative do të ketë edhe një investigim për strukturat e monitorimit të territorit, sepse ka pasur abuzime, dhe abuzimet kanë ndodhur nën hundën e tyre, “ndërkohë që një qytetar që ndryshon çatinë, vihet menjëherë nën mbikëqyrje”.
Numri dy i qeverisë ka shpjeguar se ndërtuesit abuzues kanë tre mundësi: parapagesën e shtesave të paligjshme, pra parablerjen e tyre, dhurimin ose konfiskimin. Balluku njoftoi se nesër qeveria do të prezantojë edhe paketën energjetike, si dhe masa të cilësuara si drastike për menaxhimin e krizës.
