Nga 1 Janari i vitit të ardhshëm pritet të vihen në punë TEC-et lundruese, ndërsa TEC-i i Vlorës do të nisë operimin në fund të 2023-it. Parqet e erës pritet të vihen në punë nga 2025-ta, ndërsa në vitin 2028 hidrocentrali i Skavicës do të përmbyllë projektet e akorduara deri më sot nga qeveria. Lajmi për burimet e reja prodhuese të energjisë është bërë i ditur nga ministrja e Infrastrukturës dhe Energjisë, Belinda Balluku.
Ajo ka deklaruar se në kuadër të masave për përballimin e krizës energjetike, nga 1 tetori do të nisë punë task-forca e energjisë. “Ka disa detyra kryesore dhe arsye pse po rithirret në këto momente. Duke qenë në momentet e një krizë energjetike të thellë, e cila nuk duket të ketë përmirësim, është e rëndësishme që të kemi eficencë të çdo kilovatorë. Kjo nis duke u kujdesur për lidhjet e paligjshme, dhe ne këtë e kemi bërë prej kohësh. Ne humbjet i deklarojmë rreth 20% dhe synojmë t’i ulim edhe më shumë. Kur flitet për lidhje të paligjshme në kohë krizë, ndërkohë që ne luftojmë të mos kemi kufizime, dikush që vjedh nga fatura e komshiut dhe OSHEE, nuk do të lejohet. Por task-forca do ta nisë kontrollin në institucionet shtetërore, ndaj të cilave kemi vënë disa detyra”, u shpreh ministrja.
Ajo ka bërë të ditur se ka vijuar interesi për ndërtimin e impianteve fotovolatikë diçka që është bërë edhe më interesante si investim për shkak të fizibilitetit të lartë ekonomik nga këto projekte si rezultat i çmimeve të rritura. Balluku tha se për impiantin e Karavastasë tashmë ka nisur puna prej disa kohësh ndërkohë që Spitalla është në fazat e fundit të dokumentacionit për të nisur më pas punën. Në total kapaciteti i instaluar për projektet për të cilat ka interes në energjinë fotovolatikë është 610 MË sipas ministrisë. Lidhur me një kërkesë të vetëprodhuesve të energjisë që instalojnë impiante deri në 500 KËp dhe që kanë kërkuar një bilanc vjetor ministrja konfirmoi do të ketë një konferencë javën e ardhshme.
“Është një nga kërkesat që na ka ardhur dhe ne besojmë që pavarësisht problemeve teknike që mund të ketë për zgjidhjen e saj mendojmë që është një problematikë që mund ta adresojmë dhe netimin vjetor mund të aplikohet duke e bërë kështu më të ndjeshme dhe më të rëndësishëm shkëmbimin e energjisë për palën e investitorëve”, tha Balluku.
