Të huaj që kanë ardhur në Shqipëri për të pushuar dhe shqiptarë që kanë lëvizur jashtë vendit. Kjo dinamikë ka shoqëruar turizmin shqiptar gjatë këtij viti, megjithëse bilanci ka rezultuar pozitiv. Sipas të dhënave të Bankës së Shqipërisë, shpenzimet e të huajve në Shqipëri në 6 muajt e parë të vitit arritën në 1.13 miliardë euro, me një rritje prej 64% në krahasim me të njëjtën periudhë të një viti më parë, kur vendi nuk e kishte marrë ende veten nga pandemia. Ky është niveli më i mirë i të ardhurave nga turistët e huaj prej vitesh.
Ndërkaq edhe shpenzimet që shqiptarët kanë bërë jashtë vendit për pushime janë të konsiderueshme. Sipas Bankës Qendrore, ata kanë shpenzuar në udhëtimet e tyre jashtë vendit gati 800 milionë euro, pothuajse dyfish më shumë se një vit më parë, kur ishe pothuajse e pamundur të udhëtoje në vendet e BE-së për shkak të rregullave të rrepta si kufizime në hyrje, apo kërkesa për vaksina e teste. Edhe në raport me 2019-n, shpenzimet janë rritur me 14%.
Në finale, bilanci për turizmin ka qene pozitiv këtë vit, me 338 milionë euro, që është edhe rekordin pozitiv më të lartë të regjistruar ndonjëherë në vend. Që nga viti 2013, bilanci i udhëtimeve është pozitiv, që dmth që të huajt që udhëtojnë në Shqipëri shpenzojnë më shumë sesa shqiptarët që lëvizin jashtë.
