LIGJET E BIZNESIT
Qytetarët dhe bizneset janë pesimistë për gjendjen e ekonomisë. Treguesi I Ndjesisë Ekonomike, që publikohet nga Banka e Shqipërisë, pësoi rënie në gusht me 1.8%, rënie e shënuar për të dytin muaj radhazi.
Ecuria negative e këtij treguesi reflektoi rënien e besimit në sektorët e industrisë, të shërbimeve dhe të tregtisë. Nga ana tjetër, besimi konsumator dhe besimi në sektorin e ndërtimit u përmirësuan në muajin gusht.
Treguesi i besimit të industrisë ra me 4.1%. Kjo si pasojë e vlerësimeve për kërkesën e huaj dhe të të brendshme, si edhe vlerësimeve për prodhimin aktual. Nga ana tjetër, pritjet e bizneseve të industrisë për prodhimin në të ardhmen janë rritur. Pritjet për çmimet e prodhimit regjistruan rënie të fortë, me -20.4% në muajin gusht.
Treguesi i besimit në shërbime ra me 5.8 pikë%. Kjo u përcaktua nga rënia e të dy komponentëve përbërës, vlerësimet për ecurinë aktuale të aktivitetit të tyre dhe vlerësimet për kërkesën. Pritjet e bizneseve të shërbimeve për çmimet që do të vendosin në të ardhmen janë ulur këtë muaj.
Treguesi i besimit në tregti ra me 4.4 %, i ndikuar nga vlerësimet më pesimiste për ecurinë aktuale të biznesit të tyre dhe pritjet për punësimin në muajt e ardhshëm. Pritjet e tyre për kërkesën, ecurinë e biznesit dhe çmimet që do të vendosin në të ardhmen janë vlerësuar gjithashtu në rënie.
Treguesi i besimit në ndërtim u rrit me 4.4%. Përmirësimi u shkaktua nga vlerësimet optimiste të bizneseve për aktivitetin e tyre ndërtues. Nga ana tjetër, vlerësimi i tyre për kontratat porositëse ishte në rënie këtë muaj. Pritjet e bizneseve të ndërtimit për punësimin u rritën në muajin gusht, ndërsa pritjet për çmimet në të ardhmen regjistruan rënie të lehtë.
Rritje ka pësuar në gusht edhe treguesi i besimit konsumator me 1.8%. Kjo si pasojë e pritjeve më optimiste për situatën e tyre financiare dhe për situatën e përgjithshme ekonomike në vend. Vlerësimi i tyre për blerjet e mëdha aktuale u përmirësua gjithashtu në këtë muaj, por pritjet për blerjet në të ardhmen u gjykuan në rënie.
