LIGJET E BIZNESIT
Mali i Zi u trondit pasditen e së premtes, pasi 34-vjeçari Vuk Boriloviç vrau 10 persona në Cetinje, dy prej të cilëve ishin fëmijë tetë dhe 11 vjeç.
Në masakrën më të madhe në historinë e Malit të Zi, Vuk Boriloviç gjithashtu la të plagosur gjashtë persona dhe në fund u vra nga një banor
Sipas medias malazeze Jutarnji, Vuk Boriloviçin kolegët e tij e përshkruajnë një njeri të qetë dhe të tërhequr që punonte në Parkun Kombëtar Lovçen.
Ai e nisi planin rreth orës 15:20 dhe objektivi ishte një familje qiramarrëse, një nënë me dy fëmijë.
Një nga fqinjët, i cili së fundmi ishte bërë baba, u përpoq të shpëtonte fëmijët që ishin fshehur pas derës, por Boriloviç i vrau ata dhe nënën e tyre. Pasi doli nga shtëpia, ai vrau edhe dajën e tij që po përpiqej ta qetësonte.
Pas vrasjes së katërfishtë, Boriloviç qëlloi edhe një polic. Nuk dihet nëse ka pasur shkëmbim zjarri mes Boriloviçit dhe policisë, ndërsa më pas ai vrau edhe gjashtë persona të tjerë.
Aksioni i përgjakshëm ka zgjatur më shumë se gjysmë ore, vetëm dyqind metra larg Manastirit të Cetinjes, ku zakonisht ndodhet patrulla e policisë.
Njëmbëdhjetë të vdekur, ky është bilanci i masakrës në Medovinë të Cetinjes.
Pasi vrau familjen e qiramarrësit, Vuk Boriloviç shkoi shtëpi më shtëpi dhe qëlloi fqinjët dhe bashkëqytetarët të cilët e penguan.
Ende nuk janë zbardhur motivet e krimit.
Sipas Pobjeda , disa ditë para ngjarjes tragjike në Cetinje, Boriloviç ka çuar me makinë gruan dhe katër fëmijët e tij në një qytet në bregdetin malazez dhe më pas është kthyer në vendlindje.
Kolegët e tij thonë se muajt e fundit ai ka qenë jashtëzakonisht i tërhequr dhe ka pasur pak biseda me të tjerët në punë.
Njerëz nga vendbanimi i Medovinës thonë se së fundmi Boriloviç ka qenë jashtëzakonisht dyshues dhe mosbesues ndaj fqinjëve të tij me të cilët ka jetuar për vite të tëra, ka shfaqur edhe disa shenja të sjelljes paranojake, por megjithatë askush nuk mund ta merrte me mend se çfarë do të ndodhte në të vërtetë më gusht.
“Ai po sillej si një ujk i vetmuar kohët e fundit”
“Vuk ka punuar në Parkun Kombëtar për më shumë se pesë vjet, ka qenë shef i shërbimit të higjienës së mjedisit, i ngarkuar me rregullimin e parkut, montimin e orendive… Ishte një njeri punëtor, por kohët e fundit ka qenë i tërhequr, ai ishte si një “ujk i vetmuar”. Ai vinte në punë, bënte atë që duhej të bënte dhe më pas izolohej, distancohej nga kolegët. Ai ishte një koleg dhe një mik që bënte gjithçka për të ndihmuar të tjerët”, tha njëri prej kolegëve të autorit.
Vrasja e një nëne dhe dy fëmijëve
Sipas të dhënave të deritanishme, Boriloviçi filloi zbatimin e përgjakshëm të planit diku rreth orës 15:00 dhe 20 minuta në shtëpinë e tij. Në atë kohë, në apartamentin e vogël me qira ishte vetëm një nënë me dy fëmijë – njëri ishte tetë vjeç dhe tjetri sapo kishte mbushur 11 vjeç.
Rreth orës 15:30 janë dëgjuar të shtëna në Medovinë, dëshmitarët thonë se ka pasur pesë apo gjashtë plumba të shkrepur. Një nga fqinjët u përpoq t’i shpëtonte fëmijët, të cilët u fshehën pas derës, por Boriloviç i vrau ata dhe nënën e tyre.
Me sa duket, pas vrasjes së familjes tre anëtarëshe, Boriloviç doli nga shtëpia dhe takoi dajën e tij. Duke dëgjuar të shtënat, i afërmi u përpoq ta qetësonte, por ai e ka qëlluar pa e menduar dy herë, sipas një të afërmi.
Në një video që u shfaq në rrjetet sociale, që zgjati dy minuta e 17 sekonda, i afërmi i vrasësit tregon se si Boriloviç vrau dajën e tij.
“ A e dini se çfarë bëri ai? Ka qëlluar për një orë, me armë”, tha një tjetër i afërm i Boriloviѯit, i cili pohoi se ai prej kohësh po sillejçuditshëm.
“Ka blerë një aparat fotografik para disa ditësh, është i çmendur”, tha njëri prej banorëve, duke shtuar se Boriloviçi ishte familjar, baba i tre apo katër fëmijëve.
Më pas ai përshkroi atë që ndodhi para shtëpisë së Boriloviçit, kur xhaxhai i tij u përpoq ta qetësonte dhe më pas ai e vrau.
“Unë i thashë ‘mos, Goran, prit pesë minuta, do të qetësohet’. Unë eca pranë tij dhe ai më pas i thashë: ‘Ndal, Vuçko, ndal’. Dhe ai m’u përgjigj ‘Pse ke ardhur? Kush të dërgoi? Çfarë ndalese?’. Dhe ai e vrau, e unë isha pranë tij”, tha ai.
Sipas të dhënave, pas vrasjes së katër të parëve, Boriloviç ka qëlluar në drejtim të një polici dhe e ka plagosur rëndë, ndërsa dy policë të tjerë kanë arritur t’u shmangen plumbave.
Deri më tani, nuk është e qartë se çfarë e shtyu autorin të ndërmerrte një akt të tillë.
Qeveria e Malit të Zi shpalli tre ditë zie për viktimat. Kryetari i komunës së Cetinjes , Nikola Gjuraskoviq , tha se “Cetinja përjetoi një tragjedi që nuk ishte mbajtur mend më parë”.
