Shtohen dyshimet për spiunazh/ Dy rusët dhe ukrainasi hynë në Shqipëri në tre drejtime të ndryshme, ja çfarë është zbuluar nga bisedat

Dalin të tjera detaje për tre shtetasit rusë dhe ukrainës të arrestuar nga autoritetet shqiptarë.

Ata u vunë në pranga pas sulmit ndaj ushtarëve në Uzinën e Përpunimit të Armëve në Gramsh.

Nga burimet mësohet se Fiodor Mihailoviç, Svetlana Timofoeva dhe Mikhail Zorin kanë hyrë në Shqipëri nga drejtime të ndryshme dhe jo në të njëjtën kohë, ç’ka është edhe karakteristike për organizimin e një grupi spiunazhi nga shërbimet inteligjente.

Ata kanë hyrë nga Muriqani, Porti i Durrësit dhe aeroporti i Rinasit në data të ndryshme përgjatë muajit gusht.

Autoritetet kanë sekuestruar pajisje elektronike e dronë në të cilat janë gjetur foto të objektivave ushtarake dhe strategjike jo vetëm në Gramsh, por edhe në vende të tjera në Shqipëri.

Çka është edhe më serioze, të ndaluarve iu janë gjetur komunikime komprometuese. Sipas autoriteteve shqiptare në këto komunikime është dokumentuar aktiviteti i sigurimit të informacioneve sekrete qe cenojnë sigurinë kombëtare.

Për 3 të arrestuarit rëndojnë 3 vepra penale “Goditja për shkak të detyrës”, “Dhënia e informatave sekrete”, dhe “Sigurimi i informatave”, kryer në bashkëpunim .

Gjetjet, grupi hetimor po i konsulton me NATO-n.