Të shtëna me armë zjarri në Gjilan të Kosovës.
Ngjarja ndodhi orët e para të mëngjesit të sotëm.
Si pasojë e këtyre të shtënave, i plagosur mbeti Valdrin Sulejmani.
Ai njihet ndryshe me emrin princ Vali Corleone.
Sipas burimeve të policisë, është konfirmuar rasti në fjalë dhe personi që qëlloi ndaj Sulejmanit, një vajzë 22-vjeçare. Sipas lajmi.net, e dyshuara në këtë rast është Anita Syla, e cila ka bashkëjetuar me të riun që plagosi. Asaj iu konfiskua një pistoletë me 40 fishekë.
Anita Syla, bërë e njohur nga bashkëjetesa me të ashtuquajturin Vali Corleone, shpesh herë kishte publikuar pamje edhe nga shtëpia e viktimës, video ku shihej edhe Vali.
Madje njëherë ajo kishte publikuar edhe një video ku kërcënonte një nga vajzat e shoëbizit shqiptar.
Për rastin është njoftuar edhe Prokurori i Shtetit, i cili ka urdhëruar që të ngrihet akuza “Vrasje në tentativë” dhe e dyshuara të mbahet në paraburgim për 48 orë, ndërkohë që Policia e Kosovës është duke hetuar rrethanat e incidentit.
Njoftimi i plotë i Policisë së Kosovës:
Drejtoria Rajonale Gjilan, Stacioni Policor Gjilan në orët e hershme të mëngjesit nga Qendra Emergjente Rajonale Gjilan është informuar se ishte sjellë një person i lënduar si pasojë e gjuajtjes me armë zjarri.
Në vendin e ngjarjes kanë dalë njësite relevante.
Sipas raportit të mjekut, viktima P.C.(1983) shqiptar, shtetas i Kosovës është jashtë rrezikut për jetën.
Nga hetimet e para në vendin e ngjarjes mësohet se e dyshuar në lidhje me rastin është një femër shqiptare shtetase e Kosovës, viti i lindjes 2000, e cila dyshohet se ka shkrepur armën.
Për momentin nuk dihen motivet e incidentit.
Një armë pistoletë dhe dyzet copë fishekë të së njëjtës armë janë konfiskuar në vendin e ngjarjes si prova materiale për gjykatën.
Për rastin është njoftuar Prokurori i Shtetit i cili ka urdhëruar që të ngrihët kallëzim penal për “Vrasje në tentativë’’ dhe e dyshuara të mbahet për 48 orë gjersa Policia e Kosovës, Njësiti i Hetimeve Rajonale Gjilan të hetojnë rrethanat e incidentit.
