Ish-kryeministri Sali Berisha i është përgjigjur kryeministrit Edi Rama i cili më herët gjatë ditës së sotme i cilësoi si vampirë politikë ata që reaguan ndaj ngjarjes së rëndë në Himarë.
Në një takim me qytetarë dhe biznesmenë në quytetin e Vlorës, Berisha tha se ishte e pamundur të mos reagoje pasi në vend të 7-vjeçares, në bregdet mund të ishin fëmijët e tyre.
Sipas Berishës, vampirë janë njerëzit afër Ramës që marrin persona si Arjan Tase dhe i bëjnë polic.
“Çfarë ka bërë qeveria për të ndihmuar operatorët turistikë? Asgjë. Po e rrënon vjedhja turizmin dhe Shqipërinë. Ka patur disa mbytje. Gazetarët raportonin se nga Velipoja në Kepin e Stillos nuk ka roje bregdetare. Sepse licensat i kanë marrë privatët që menaxhojnë plazhin. Ndodhin ngjarje ndër më tragjiket. Buzë ujit. 7-vjeçarja nuk mund të shkonte thellë. E bluajti skafi i komisarit.
Komisari, skafin e paregjistruar. E thoshte sot një qytetar shumë bukur. Ky kryeministër na thotë të dënohet ai që e kreu. Jo mo thotë, të dënohet dhe ai që e merr nga trafikant dhe e bën polic, nga polic e bën skafist dhe më pas e bën vrasës. Për t’u justifikuar, thotë vampirët politikë e mediatik. Flet për ata që reagojnë. Po secili prej nesh mund të kishim fëmijët tanë aty në breg. Si mund të vish ti tua bluash.
A ka rregulla dhe ligje ky shtet? Vampirë nuk janë ata gazetarët që na ndihmojnë të kuptojmë të vërtetëtn. Vampirët janë njerëzit afër tij. A nuk i mori jetën ambulanca 10-vjeçarit në Gjirokastër. Na thanë që autoambulanca po transportonte një grua shtatzënë. Një gazetar tha se ishte gënjeshtër” – tha Berisha.
