Çonin besimtarë në Mekë/ Ky është çifti që u vra në Tiranë, autori qëlloi vëllanë dhe kunatën pas sherrit për biznesin

Një vrasje e dyfishtë tronditi Tiranën sot pasdite.

Viktimë mbetën Dritan dhe Nora Muskurtim, të cilët lanë pas tre fëmijë të mitur.

Ata u qëlluan për vdekje në rrugën “Islam Alla” nga vëllai i Dritanit, shtetasi Arsen Muskurti.

Mësohet se protagonistët e ngjarjes së rëndë ishin në konflikt prej kohësh.

Paraprakisht, bëhet me dije se dy vëllezërit kishin hapur një agjenci udhëtimesh dhe çonin besimtarët myslimanë në vendin e shenjtë, në Mekë. Konfliktet për pronësinë kanë bërë që sot Tirana të tronditet nga ngjarja e rëndë, ku vëllai ka vrarë vëllanë dhe kunatën.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Dëshmitarët dhe pronarët e bizneseve të tjera aty pranë që i njihnin palët, janë shprehur se viktimat janë pikërisht Dritan Muskurti dhe bashkëshortja e tij. Ata kanë parë dhe autorin, Arsen Muskurtin, duke u larguar me armë zjarri.

Kanë tentuar ta ndalojnë por kur kanë parë që ai ishte i armatosur, janë larguar dhe ata dhe kanë njoftuar menjëherë Policinë. Autori është larguar nga vendngjarja bashkë me armën e krimit dhe deri tani nuk është mundur të ndalohet.

Dritan Muskurti raportohet se kohë më parë kishte kërkuar mbrojtje në Polici, pasi i frikësohej një sulmi nga i vëllai, autori i sotëm Arsen Muskurti.

“Më datë 30.08.2022, në rrugën “Islam Alla”,  dyshohet se si pasojë e një konflikti familjar, shtetasi A. M., dyshohet se ka qëlluar me armë zjarri drejt vëllait të tij shtetasit D. M., 44 vjeç, dhe shtetases N. M., 33 vjeçe (dyshohet bashkëshortja e shtetasit D. M.) të cilët si pasojë kanë ndërruar jetë.

Shërbimet e Policisë kanë shkuar menjëherë në vendngjarje dhe po vijojnë kontrollin e zonës me qëllim kapjen e autorit. Grupi hetimor  nën drejtimin e Prokurorisë po punon  për sqarimin e plotë të rrethanave të ngjarjes”, njofton Policia e Tiranës.

Në vendin e ngjarjes ka prezencë të lartë të punonjëseve të Policisë, hetues të krimeve të Tiranës, vetë shefi i Komisariatit nr.3 dhe kryepolici i Tiranës Lenc Panganika, ndodhen në vendin e krimit. Familjarë të viktimave kanë shkuar gjithashtu në rrugën ku ndodhi vrasja.