Bota pritet të arrijë 8 miliardë banorë këtë vit, ja cili është shteti që do të kalojë Kinën

Popullsia e botës pritet të arrijë në tetë miliardë banorë më 15 nëntor të këtij viti.

Parashikimi është bërë nga Kombet e Bashkuara.

“Kjo na kujton përgjegjësinë tonë të përbashkët për t’u kujdesur për planetin tonë. Është një moment për të reflektuar se ku nuk i kemi përmbushur ende angazhimet ndaj njëri-tjetrit”, tha sekretari i përgjithshëm i OKB-së, Antonio Guterres.

Parashikimi i Departamentit të OKB-së për Çështje Ekonomike dhe Sociale thotë se popullsia e botës po rritet me ritmin e saj më të ngadaltë që nga viti 1950.

Ajo duhet të arrijë në 8.5 miliardë banorë në vitin 2030 dhe në 9.7 miliardë në vitin 2050. Sipas raportit, popullsia do të arrijë kulmin në rreth 10.4 miliardë njerëz në vitet 2080 dhe do të qëndrojë në atë nivel deri në vitin 2100.

🎙️ Podcast “Money Hour” | Fast News Economy

🏛️ LIGJET E BIZNESIT–Ligji në Kohë Reale për Biznesin Modern

Më shumë se gjysma e rritjes së popullsisë së botës në dekadat e ardhshme do të përqendrohet në tetë vende, thuhet në raport.

Këto vende janë: Republika Demokratike e Kongos, Egjipti, Etiopia, India, Nigeria, Pakistani, Filipinet dhe Tanzania. Raporti, po ashtu, thekson se India do ta kalojë Kinën si vendi më i populluar në botë në vitin 2023. Popullsia e Indisë aktualisht përbëhet prej 1.412 miliard banorësh, ndërsa Kina ka 1.426 miliard banorë.