Mediat italiane kanë publikuar pamje nga momenti i arrestimit të 39-vjeçarit shqiptar, i cili shkaktoi panik dhe alarmoi policinë e Romës, pasi me mjetin tip “BMW” u fut në sheshin kryesor të Vatikanit.
Shqiptari është identifikuar si Erjol Nako. Sipas mediave atje, policia për shkak të incidentit ka përdorur edhe armët me qëllim neutralizimin e drejtuesit të mjetit.
Karabinierët i kanë bërë me shenjë drejtuesit që të ndalojë automjetin, mirëpo 39-vjeçari nuk iu bind urdhrit dhe është larguar duke përplasur edhe dy oficerë.
Në tentativë për t’u larguar Nako ka hedhur nga dritarja e mjetit një orë dhe një portofol, me idenë se do të çorientonte efektivët, por karabinierët e kanë ndjekur sërish duke e neutralizuar në fund me një teaser elektrik.
Momentet e kaosit në zonën e Panteonit në Romë janë filmuar po ashtu edhe nga qytetarët.
Pas arrestimit, Erjol Nako si dhe dy efektivët që mbetën të plagosur gjatë aktit të tij të çmendurisë u dërguan për ndihmë mjekësore në spital.
Mbeten ende të paqarta arsyet se përse 39-vjeçari iu shmang postbllokut duke kryer manovra të rrezikshme në rrugë.
