LIGJET E BIZNESIT
Shoqata e Hidrokarbureve ka reaguar në lidhje me pretendimet se kompanitë e tregtimit të karburanteve në vend nuk po reflektojnë ecurinë e çmimeve në bursa.
Ishte deputeti i Partisë Socialiste Erion Braçe i cili denoncoi sot se ulja e çmimit për fuçi nuk po reflektohet në çmimin e karburanteve në Shqipëri.
Sipas Shoqatës nuk mund të përdoret si referencë ecuria e çmimit të fuçisë së naftës në bursa me çmimin e shitjes së karburantit në pikat, që tregtojnë me pakicë. “Fuçia është tregues i naftës së papërpunuar dhe kjo po bie (edhe pse jo kush e di se çfarë) pasi rafineritë nuk po e kërkojnë, sepse me këto çmime ato dalin me humbje. Nafta për transport, pra për makina, ndryshe nga ajo në fuçi, në treg varet nga kuotimi, që i behet çdo ditë çmimit në publikimin e çmimeve PLATT’S dhe bëhet në USD për ton. Ky çmim po rritet pavarësisht se nafta e pa përpunuar (fuçia) ka pësuar pak rënie, kjo se duke u ulur kërkesa për naftë të pa përpunuar (fuçi), rafineritë po krijojnë mungesë në treg të naftës për transport (makina)”, thuhet në reagim.
Shoqata thotë se Bordi i transparencës, që u krijua në fillim të marsit dhe cakton periodikisht çmimet e tregtimit me shumicë e pakicë të karburanteve e gazit, nuk po i favorizon aspak kompanitë. “Kushdo mund të verifikojë nga bilancet e kompanive se mesatarisht 5 lekë për litër shpenzime operative nuk u lejohet kompanive t’i përfshijnë në çmimin e tabelës”.
Për një verifikim real e koherent, Shoqata bën me dije se nga korrigjimi i çmimit i datës 1.6.2022, çmimi i publikuar në Platt’s, në usd për ton tregon se nafta për makina është rritur me + 26 $/toni dhe benzina + 17,5 $/toni. “Kjo do të thotë se deri ne korrigjimin e bërë nga bordi, vetëm për këtë efekt, kompanitë shesin me humbje -3 leke/lit naftën dhe -2,7 leke/lit benzinën”.
🎙️ Podcast “Money Hour” | Fast News Economy
🏛️ LIGJET E BIZNESIT–Ligji në Kohë Reale për Biznesin Modern
Shoqata thekson se fakti që në këtë treg nuk ka hyrje të reja prej vitesh tregon se ai nuk po gjeneron fitime të larta.
Bordi i Transparencës vendosi dje një rritje të çmimeve të karburanteve. Nafta u shtrenjtua me 9 lekë për litër duke arritur në 248 lekë. Benzina do të tregtohet me 244 lekë për litër, nga 237 lekë që ishte në vendimin e mëparshëm.
Nafta po arrin sërish afër nivele maksimale historike prej 260 lekësh, nivel që u shënua në fillim të marsit, kur nisën sulmet e Rusisë ndaj Ukrainës, duke shkaktuar probleme në zinxhirin global të furnizimit. Pas rritjes së fortë dhe protestave për shtrenjtimin e karburantit u krijua Bordi i Transparencës, që fikson në mënyrë periodike çmimet e shitjes me shumicë dhe pakicë. Në krahasim me fundin e muajit shkurt, nafta aktualisht është 30% më e shtrenjtë.
