Është e zakonshme të bëheni “miq të shpejtë” me narcistët, sepse ata janë shpesh të angazhuar që herët në marrëdhënie, tregohen mbështetës dhe sharmant. Në këtë fazë, madje mund të shkojnë përtej asaj që pritet nga një mik i ri. Megjithatë, nëse jeni miq me një narcist, mund të zbuloni se me kalimin e kohës ata bëhen jombështetës, territorialë, të padrejtë, shpërfillës, të paarsyeshëm dhe madje agresivë.
Disa shenja të një miku narcist janë:
1. Ata kërkojnë lëvdata dhe admirim, vazhdimisht
Për shkak se ata nuk dinë si të gjejnë një lloj vetëvlerësimi të brendshëm, miqtë narcistë do presin dhe do kërkojnë vazhdimisht lëvdata nga ju, për të ushqyer vetëvlerësimin e tyre. Ata mund të shprehin pasiguri sipërfaqësore me shpresën se ju do t’i komplimentoni për të kundërtën, mund t’ju kërkojnë t’i komentoni në Instagram etj.
2. Vendosin vetëm nevojat e tyre në radhë të parë
Për shkak se narcisistët e shohin veten si më të mirë se të tjerët, ata priren të jenë të preokupuar me kënaqësinë e tyre dhe nuk kanë ndjeshmëri për nevojat e miqve. Për shembull, nëse e keni lënë për të dalë diku dhe ata vijnë me vonesë, gjëja e fundit që u shkon në mendje është të kërkojnë falje. Një mik narcist do injorojë çdo kërkesë/preferencë tuajën dhe mund t’ju akuzojë si “egoiste” apo “kontrolluese”, për gjënë më të vogël.
3. Bisedat qëndrojnë në nivel sipërfaqësor
Narcistët fillimisht mund të perceptohen nga miqtë si introvertë ose privatë dhe të fshehtë kur, në realitet, ata i mbajnë bisedat sipërfaqësore në përpjekje për të shmangur intimitetin. Miqtë narcistë shpesh ndajnë informacione për veten e tyre me të tjerët vetëm kur janë vetë-promovuese ose kur i ndihmojnë ata në përfitime personale.
Përveçse nuk ndajnë asgjë personale, miqtë narcisistë mund të mos bëjnë asnjë pyetje për ju. Kjo sepse, ndër të tjera, narcistët priren të kenë pak interes të vërtetë për të tjerët.
Një tjetër arsye lidhet me ndjeshmërinë e bisedës. Për shembull, një narcist nuk ka gjasa t’ju pyesë “Si po ndiheni pas vdekjes së babait tuaj?” – sepse kjo mund të çojë në një bisedë më të cënueshme në të cilën pritet që edhe ata të flasin për përvojën e tyre me humbjen.
4. Ata nuk janë aty për ju kur keni vërtet nevojë për ta…
Narcistët nuk shqetësohen për nevojat e të tjerëve dhe për të kuptuar ndjenjat e tyre, përveç rasteve kur kjo gjë perceptohet si e rëndësishme ose e dobishme për ta personalisht. Në një miqësi, kjo mund të duket si shmangie e bisedave emocionale.
5. …Me përjashtim të rasteve kur është në interesin e tyre
Pavarësisht se shpesh nuk janë pranë jush kur keni nevojë për ta, miqtë narcistë mund të bëjnë kaq shumëëë për ju, veçanërisht në fillim. Shpesh një njeri i tillë do bëjë diçka shumë të madhe për ju, për ta përdorur si një “borxh” ndaj tyre – herën tjetër kur atij do t’i nevojitet një nder nga ty.
Veçori të tjera që duhet të keni parasysh:
#6 – Nëse nuk i përmbushni pritshmëritë e tyre, miqtë narcistë mund të hakmerren me agresivitet apo kërcënime për të gjetur miq “më të mirë”.
#7 – Shpërfillin pikat e forta dhe sukseset tuaja. Kur flisni për veten, ata ndryshojnë bisedën dhe ju “vjedhin” vëmendjen.
#8 – Kanë pritshmëri të paarsyeshme.
#9 – Rrallë duken të penduar për diçka.
#10 – E kanë të vështirë t’u kërkojnë falje miqve dhe po aq të vështirë, të falin.
#11 – Ju përdorin dhe ju shfrytëzojnë për përfitimet e tyre. Kanë një mënyrë për t’ju fajësuar derisa të marrin atë që duan prej jush.
#12 – Janë xhelozë për marrëdhëniet që keni me njerëz të tjerë.
#13 – Shpesh bëhen armiqësore dhe agresivë me ju – me justifikimin se “kështu dinë të debatojnë”.
#14 – Pasi keni kaluar shumë kohë me ta, mund të ndiheni të lodhur, të frustruar dhe pa energji. Ndoshta sepse keni kaluar shumë kohë duke dëgjuar se si gjithë bota vërtitet rreth tyre.
#15 – I japin fund miqësisë në momentin që s’kanë më asnjë lloj interesi apo përfitimi prej saj.
#16 – Janë në kërkim të miqve “më të mirë”.Anabel
