Çfarë ndodhi? Albin Kurti ndërron papritur banesën, ja cila është arsyeja që e mori këtë vendim

Kryeministri i Kosovës Albin Kurti ka vendosur të ndërrojë banesën.

Ai tashmë do të paguajë një qira mujore prej 250 euro.

Kështu është shprehur zëdhënësi i qeverisë Përparim Kryeziu, i cili ka dhënë edhe detaje nga lëvizja e befasishme.

Ai bëri me dije se tanimë, Kurti banon në zonën e Taslixhe të Prishtinës, në një banesë me sipërfaqe 230 metra katror.

Kjo banesë është në pronësi të dy shtetasve të Kosovës të cilët jetojnë në Norvegji. Ata ia ofruan Kurtit banesën pa asnjë çmim, por Kurti nuk e ka pranuar diçka të tillë.

Sipas Kryeziut, e gjithë hapësira e banesës nuk shfrytëzohet nga Kurti, teksa shtoi se kryeministri u largua nga banesa afër Parkut të Qytetit për shkak të sigurisë.

Postimi i Kryeziut:

Kryeministri Kurti paguan qira mujore prej 250 euro. Ai banon në shtëpinë e bashkatdhetarëve Blerim dhe Shega Zagragja që jetojnë në Drammen të Norvegjisë. Kryeministri i njeh ata që prej disa vitesh. Anëtarët e tjerë të familjes Zagragja i ka njoftuar më vonë, pasi që është bërë banor në Taslixhe.

Blerim dhe Shega Zagragja kanë dashur që Kryeministrit Kurti t’ia mundësojnë të banojë falas në shtëpinë e tyre, mirëpo Kurti nuk ka pranuar. Janë marrë vesh që ai ta paguajë qeranë aq sa ka qenë duke e paguar më herët te banesa afër parkut të qytetit.

Shtëpia në Taslixhe ku banon kryeministri nuk i ka 500 por 230 metra katrorë. Dhe kjo hapsirë nuk është plotësisht e shfrytëzueshme. Dy dhoma janë të papërdorshme, njëra është e bllokuar me gjësendet e pronarit e tjetra është dhomë e sigurisë.Shtëpia është e vjetër rreth 50 vjeç.

Kryeministri pat vendosur që të ndërrojë vendbanim pas udhëzimeve të këshilltarëve të sigurisë të cilët kanë vlerësuar që mbrojtja e afërt dhe policia e Kosovës kanë shumë vështirësi për përgatitjet dhe organizimin e sigurisë aty ku banonte Kryeministri te parku i qytetit.