Zelensky mban fjalën nesër në Kuvendin e Shqipërisë, Nikolla nis përgatitjet

Ditën e martë, presidenti i Ukrainës Volodymyr Zelensky do t’i drejtohet kuvendit të Shqipërisë me një mesazh. Kryeparlamentarja Lindita Nikolla ka firmosur urdhrin për mbledhjen e seancës së posaçme.

Mësohet se seanca do të nisë në orën 11:00 dhe Zelelenky do të flasë nëpërmjet platformës Zoom.

Sipas urdhrit të Nikollës, Sekretari i Përgjithshëm ngarkohet për marrje të masave për realizimin e infrastrukturës së nevojshme për realizimin e lidhjes direkte me presidentin e Ukrainës.

Që nga nisja e luftës, presidenti i Ukrainës i është drejtuar disa parlamenteve në botë, ku ka shprehur mirënjohjen e tij për mbështetjen, ndërsa ka kërkuar vazhdimisht ndihmë.

Sakaq, Shqipëria, anëtare e NATO-s është pozicionuar krah aleatëve perëndimorë dhe ka dënuar agresionin ushtarak të Rusisë mbi Ukrainë. Po ashtu, i është bashkuar sanksioneve ndaj Moskës.