“Të përgjohen celularët e policëve” Eksperti i Sigurisë hedh dyshimet e forta për aksionin e SPAK

Eksperti i sigurisë Fatjon Softa ka komentuar ngjarjet kriminale që u zbardhën në vend për shkak të dëshmisë së dhënë nga Nuredin Dumani.

Dje SPAK goditi  grupe kriminale në Tiranë, Durrës dhe Elbasan.

Bëhej fjalë për krimet më të rënda na këto vitet e fundit, ekzekutime mafioze por dhe urdhëra për vrasje, pagesa qindra mijëra euro për të kryer krime, etj.

Mes të ndalurve në kuadër të megaoperacionit të SPAK është edhe Leonard Palushi, ish-shef policie në Elbasan, aktualisht polic në Lezhë. Sipas burimeve, Palushi shiste informacion te grupet kriminale dhe dekonspironte aksionet. Për këtë arsye, Softa thekson se është e rëndësishme që çdo punonjësi policie t’i përgjohet telefoni.

“Kemi dyshime të arsyeshme. Kreu i SPAK thotë se e kishim lokalizuar por nuk e gjetëm. Është mundësia e dekonspirimit. Këtu përfshihen shumë struktura dhe forca, vetë komisariatet e zonave ku kanë vepruar dhe punonjës nga më të thjeshtët deri tek më të specializuarit, janë shefat e komisariateve dhe vartësit e tyre që kanë përgatitur një plan masash për të krijuar një operacion dhe mundësia e dekonspirimit është.

Aq më tepër që sot mënyra e dhënies së informacionit është e sofistikuar. Janë aplikacionet, radiot e koduara të cilat përdorin frekuenca të veçanta të cilat rrisin ose ulin shpejtësinë për të mos u identifikuar. Kjo është një nga ato arsye përse çdo punonjësi policie duhet t’i përgjohet telefoni. Në momentin që je punonjës policie, për hir të dyshimeve që kemi, tregon se janë të përfshirë dhe pse të mos përgjohet telefoni. Nuk është privatësi kur ke një detyrë të tillë”, tha Softa.