Detaje të tjera kanë dalë nga plagosja e një natë më parë në Shkodër e shtetasit Dedë Plani, 60 vjeç, djali i xhaxhait i Bardhok Planit që u vra në një atentat mafioz në prillin e vitit të kaluar.
Bëhet me dije se 60-vjeçari është dërguar drejt Tiranës për një mjekim më të specializuar për shkak të plagëve të rënda që ka në trup.
Burimeve pranë spitalit të Shkodrës bëjnë me dije se Dedë Plani është jashtë rrezikut për jetën, por është transportuar drejt Tiranës në spitalin e Traumës për shkak të dëmtimeve të rënda që ka marrë nga plumbat.
Dedë Plani mësohet se ka 3 plumba në krahë, dhe një plumb në brinjë, pjesën e legenit dhe në këmbë. Sikurse çdo natë Dedë Plani ndodhej në punë duke bërë roje pranë një karburanti në hyrje të rrugë Shkodër-Koplik, pas rotondos së Dobraçit.
Papritur një person me motor është afruar, është ulur dhe më pas ka qëlluar në drejtim të 60 vjeçarit 8 herë me pistoletë duke e lënë të plagosur.
