“Nuk na kanë pyetur” Akademia e Shkencave kundër marrëveshjes së Butrintit, flet Gjinushi

Akademia e Shkencave ka dalë kundër ligjit të miratuar në parlament për menaxhimin e parkut arkeologjik kombëtar të Butrintit.

Në një konferencë me akademikë që u shndërrua në debat, kreu i këtij institucioni Skënder Gjinushi pranoi se nuk janë pyetur nga qeveria.

“Morëm dijeni për gjënë me pak vonesë. Nuk menduam që do e kalonin kaq shpejt. Së pari i takonte pikërisht qeverisë të konsultohej me Akademinë e të konsultohej me institutet përkatëse. Në menaxhimin shkencor po e quaj, pra hulumtim, restaurim etj, mbrojmë interesat a rolin e instituteve. Institutet ( Arkeologjia dhe Monumentet) s’mund të rrinë indiferente apo të pranojnë të përjashtohen. Personalisht, mendoj që këtu ka një boshllek, ka një anashkalim.”, tha Skënder Gjinushi.

Në dy orë konferencë, mes të tjerësh, arkeologu Neritan Ceka tha se kolegu i tij  Richard Hodges në një artikull të 2012-ës e ka quajtur mit qytetërimin ilir. Ish-drejtori i Parkut të Butrintit, Auron Tare, ishte i ashpër me arkeologët dhe kujtoi se në proces specialistët shqiptarë janë lënë jashtë.