Gazetari Erjon Skëndaj ka shprehur habi lidhur me sqarimin e Ministrisë së Shëndetësisë për ngjarjen shkëputjes së ashensorit në QSUT “Nënë Tereza”, ku një paciente dhe barrelisti që e transportonte bashkë me infermieren, mbetën të dëmtuar.
Në studion e lajmeve të MCN Tv, ai ngriti pikëpyetje nëse kemi të bëjmë me këputje të kavos, apo çorientim total i ashensorit.
“Ashensori i vendosur, është ashensor relativisht i ri, ka vetëm 11 vite punë. Pacientja e cila transportohej me barrelë lëvizëse ka përdorur një nga 4 ashensorët, ashensorin e madh shoqëruar nga ekipi i plotë infermier dhe barrelist. Ashensori funksionon me çip vetëm për personelin, për përdorim spitali.
Ngjarja ndodhi në katin -1 ku ndodhet skaneri dhe rezonanca. Ngjarja ka ndodhur në momentin kur është hapur dera dhe çorientuar ashensori, ka pësuar goditje në kokë pacientja, ndërkohë që barrelisti ka thyer këmbën dhe infermierja ka kaluar në traumë psikologjike për disa orë, ndodhet në mbikëqyrje nga kolegët. Nuk dihet nëse ka patur këputje të njërës kavo që ka çbilancuar ashensorin.
Mua nuk më rezulton këputje e kavos. Ka mungesë informacioni, mjekët janë të rezervuar se kemi parë dhe heqje nga puna kur denoncojnë ngjarjen. Kjo është ngjarje e rëndë”.
Lidhur me mirëmbajtjen e ashensorëve, gazetari shtoi se kontrolle periodike dhe duhet pyetur kompania menaxhuese “Sulollari”, e cila ka kontrollin nga maji 2020.
Ai bëri të ditur se më përpara ka qenë kompania “German” ajo që e ka menaxhuar dhe gjatë kësaj kohe nuk ka patur aksidente.
“Më bën përshtypje se ky është një ashensor i ri ka vetëm 11 vite, kam hipur në këtë ashensor, ka dhe tabelë elektronike, është i gjeneratave të reja, punon me çip.
Një mirëmbajtje periodike mund ti bësh për pjesët mekanike. Këta janë ashensorë elektronik. Kërkojnë mirëmbajtje shumë komplekse. Ne kemi një kompani full risk. Merr përsipër menaxhimin dhe mirëmbajtjen e ashensorëve, shikon gjithë komponentët edhe mënyrën se si funksionon ashensorët.
Ne po vëmë një diskutim një ashensor që ka 11 vite, po sikur ta zgjerojmë hapësirën çfarë ndodh me ashensorët në pallatet tona. Ngjarja ka ndodhur në katin -1 te urgjenca e re, urgjenca e Covidit. Ndërsa te 6 katëshi, tek sëmundjet e brendshme, atje ashensori vazhdimisht pëson defekt. Ka pasur edhe video se si pacientët mbaheshin në krahë në qafë, për tu ngjitur në katin tjetër.
Godina në fjalë është inauguruar në 2012. Kjo jep alarm shumë të madh. Pse ndodhi ngjarja? Ndodhi në një ashensor të ri. Kjo e zgjeron diskutimin. Kjo është shumë e rëndë, duhet hetuar kompania, sa i plotëson kushtet dhe mënyra si janë bërë tenderat është e dyshimtë. Janë bërë dy tendera për të njëjtin objekt në të njëjtën kohë, njëri 24 milionë, tjetri 100 milionë vjetra.
Këtu ka çudi shqiptare, pikëpyetje shumë të mëdha. Nuk është tenderi i parë që nuk plotësohet dokumentacioni. Qeveria të mos presë kur të ndodhin ngjarjet.
Pacientja ka pësuar goditje në kokë, ndërkohë që MSH tha se ka pësuar tromboemboli, mpiksje të gjakut në mushkëri. Apo ka goditje në kafazin e kraharorit? Nuk ndodhin ngjarje të tilla pse mbete bllokuar, përpiqesh të mbulosh të vërtetën që ka ndodhur brenda godinës më të re të QSUT”.
