I riu vari veten në Komisariatin e Kavajës, arrestohen 3 punonjësit e policisë

Arrestohen tre punonjës të policisë së Kavajës pas vetëvrasjes në paraburgim të 31-vjeçarit Ilvi Meta.

Mësohet se në pranga kanë rënë Bexhet Berberi, Rushit Kola dhe Petrit Brahimaj.

Sipas informacioneve, Berberi dhe Kola kanë qenë policë roje tek dhoma e paraburgimit.

Ilvi Meta i cili ishte ndaluar ditën e mërkurë, i ka dhënë fund jetës brenda qelisë duke u vetëvarur, vetëm 6 orë pas shoqërimit nga ana e policisë.

I riu u ndalua me akuzën për vjedhje, akuzë për të cilën ishte dënuar edhe më parë. Ndalimi i tij  ishte bërë pasi akuzohej për një vjedhje të ndodhur në datën 2 prill në një banesë në Kavajë, për një makinë qepëse dhe prerëse pllakash.

Ilvi Meta ishte identifikuar nga shenjat e gishtave të mbetura aty në vendin ku ndodhi vjedhja. Ndërkohë menjëherë pas kësaj ngjarjeje të rëndë është ngritur një grup hetimor, si dhe kanë shkuar me urgjencë në Komisariatin e Kavajës Drejtori i Policisë së Qarkut të Tiranës, Lorenc Panganika, dhe disa oficerë të SHÇBA-së.

Lidhur me këtë ngjarje ka reaguar edhe babai i viktimës Ilvi Meta, Agim Meta, i cili hedh akuza ndaj policisë, ndërsa ka deklaruar se djali i tij u akuza për vjedhjen e një dere alumini.

Po për këtë ngjarje ka reaguar edhe opozita përmes ish-kryeministrit Sali Berisha dhe deputetit të PD, Dashnor Sula, të cilën akuzojnë policinë, duke thënë se i riu nuk është vetëvrarë, por ka humbur jetën si pasojë e dhunës së ushtruar brenda qelisë nga uniformat blu.