LIGJET E BIZNESIT
Deputeti i Partisë Demokratike, Tritan Shehu, ka reaguar me anë të një postimi në rrjetin e tij social ‘Facebook’, në lidhje me fjalën e mbajtur nga presidenti i Ukrainës Volodymir Zelensky në Parlamentin shqiptar.
Shehu e quajti fjalën e liderit ukrainas, si një “dush të ftohtë” për politikat e ndjekura nga kryeministri Edi Rama.
Ai theksoi se Zelensky kërkoi mos pranimin e turistëve rusë në Shqipëri, në një kohë që Rama vetëm para pak ditësh deklaroi se këto turistë do të mirëpriten.
Deputeti Shehu e ka përkthyer sjelljen e Ramës, si pasojë e ligjeve të tij me presidentin serb Aleksandër Vuçiç.
Postimi i plotë:
Fjala e Zelensky, ishte një “dush i ftohtë” për Ramën dhe “lojën me dy porta” të tij!
Ajo fjalë, përveç kortezive të rastit, përmbante dy protesta-kërkesa konkrete të Presidentit të Ukrainës ndaj Ramës:
-Mos pranoni turistë rusë këtë vit.
-Mos lejoni anijet ruse të futen në portet tuaja.
Duke qenë në të vërtetë kështu një “shkulje e veshit” dhe denoncim për Kryeministrin e “lojen e tij me dy porta”, që para pak ditësh deklaroi se do të:
a-Mirëpresë turistët rusë.
b-Nuk do të pengojë arritjen e mjeteve tregtare ruse në vendin tonë.
Pa dyshim kjo “zemërgjerësi” e Ramës ndaj Rusisë është në përputhje dhe me kërkesat e presionet e Vuçiçit, i cili është kthyer në “kordonin umbilikal” midis Moskës e Europës, dhe i ndërvarur nga inisiativa serbe e “Ballkanit të hapur”.
Kjo manifestohet qartësisht edhe në skenarin e Rilindjes në Kuvend, ku nuk po lejohet të kalojë, edhe në kundërshtim me rregulloren, asnjë rezolutë e re mbas asaj gjysmakes e tashmë larg realitetit të iniciuar nga PS.
Zhvillimi i ngjarjeve, aplikimi i një genocidi të vërtetë rus në Ukrainë, interferencat e Rusisë në Rajonin tonë, roli mohues i Vuçiçit për të përkrahur sanksionet ndaj Rusisë, etj, e imponojnë këtë hap parlamentar të qartë e të gjerë në përmbajtjen e tij.
Këtë e kërkojnë edhe prononcimet e Presidentit Biden e të liderëve të tjerë për zhvillimet e mëtejshme në Ukrainë.
Në këto kushte Kuvendi i Shqipërisë duhet të vihet në lëvizje për të miratuar një Rezolutë të re ku të kërkohet:
1-Që Qeveria të bllokojë dhënien e vizave turistike për rusët dhe as të lejojë hyrjen e mjeteve nga ai vend.
Kjo jo thjesht se e kërkoi Zelensky, por dhe se përputhet me moralin, detyrimet dhe Sigurinë tonë Kombëtare.
2-Dënimi i qarte i atij agresioni e genocidi fashist në Ukrainë, duke vendosur termat reale.
3-Marrja e qëndrimeve të pa dyzuara ndaj rreziqeve për destabilitet të rajoni tonë, me kritikat për qëndrimin serb për mos aderimin në sanksionet.
4-Dalja e Shqipërisë nga “Ballkani i hapur” alias “Jugosllavia e Re” të Serbisë, e lidhur kjo me Moskën nëpërmjet Traktatit EuroAsian.
5-Ulja e nivelit të përfaqësimit dilomatik rus në Tiranë, në nivelin e të “ngarkuarit me punë”.
6-Që Rama të japë shpjegime nëse ai i qëndron asaj që deklaroi për Rusinë jo larg, kur tha se nuk e cilësoj si “vend jo mik”, ndërsa Rusia na ka cilësuar tashmë të tillë, veprim ky që duhet kryer edhe ndaj Bjellorusisë.
“Loja me dy porta” duhet të përfundojë!
