Dështon raundi i parë/ Mblidhet Kuvendi, asnjë kandidat për president

Kuvendi është mbledhur pak minuta më parë për procedurë.

Në takim duhet të kryhej raundi i parë i zgjedhjes së presidentit të ri.

Duke qenë se as opozita e as mazhoranca nuk kishin depozituar asnjë emër, ky raund quhet i dështuar dhe për këtë arsye Kuvendi i Shqipërisë mbylli punimet në pak minuta.

Deputetja Klotilda Bushka, në relacionin e saj para deputetëve tha se në mbledhjen e Komisionit të Çështjeve Ligjore, nuk është paraqitur asnjë kandidaturë brenda afateve ligjore, çka bën që raundi i parë të kalojë pa asnjë emër dhe pa votim.

Ditën e nesërme pritet të mblidhet Konferenca e Kryetarëve për të përcaktuar datën për raundin e dytë, i cili duhet të jetë brenda 7 ditësh, pra deri më 24 maj.