Atentati i fundit/ Zbardhet dëshmia: Si Nuredin Dumani kuptoi se e tradhtuan

Pas prishjes me Talo Çelën,  Henrik Hoxhaj duket se është bashkëpunëtor i ngushtë i Nuredin Dumanit, duke kryer një sërë porosish në emër të tij.

Në dëshminë e tij, Hoxhaj thekson  se kishte marrë një porosi nga Dumani, sipas dosjes së siguruar nga ABC, për të vrarë biznesmenin e makinave Elton Kila, të njohur si “Oti” në Elbasan kundrejt shumës 200 mijë euro.

Hoxhaj thekson në dëshmi se kishte shkuar disa herë për të vrarë Kilën, por nuk kishte mundur ta kryente “punën”. I pakënaqur që Hoxhaj nuk po mbaronte punë, Nuredin Dumani vjen vetë nga Kosova për të kryer vrasjen e Kilës.

Hoxhaj thotë në dëshmi para prokurorëve se kishte shkuar për ta marrë vetë Nuredin Dumanin në Kukës me një makinë tip BMË X3 që e kishte me qira. Ai thekson se në kthim nuk janë futur nga pika ku paguhet tarifa e autostradës pasi kishte kamera, por përmes një rruge tjetër.

Më tej, ai tregon se e ka çuar Nuredin Dumanin në një shtëpi në lagjen “Petro Sota” në Fier, e cila në fakt ishte edhe shtëpia ku Dumani u arrestua pasi njoftoi vetë policinë sepse në fund dyshoi se e kishte shitur edhe Henrik Hoxhaj.

Hoxhaj tregon se është kujdesur vazhdimisht për Dumanin teksa rrinte në Fier duke i çuar ushqime dhe gjithçka i nevojitej atij pasi nuk dilte në qytet.

“Njëherë i çova edhe byrek me spinaq që e kishte bërë nëna ime”, tregon Hoxhaj.

Sipas Hoxhajt, ai dhe Dumani kishin shkuar të paktën edhe dy herë të tjera në Elbasan për “punën” me Elton Kilën. Hera e parë sipas tij ishte për vëzhgim dhe për të parë nga do iknin dhe hera e dytë për ta vrarë, por duke mos e gjetur aty nuk kanë kryer dot gjë.

Më datë 29 mars ata shkojnë sërish për të vrarë Kilën, por pasi kanë pritur gjithë ditën nëpër Elbasan nuk e kanë parë. Në këtë moment kanë vendosur të kthehen në Fieri, por pikërisht atë pasditë Nuredin Dumanit i bëhet atentat.

Është pikërisht ky momenti sipas prokurorëve ku Dumani ka filluar të dyshojë se e kishin nxjerrë në pritë duke dyshuar te Henrik Hoxhaj.

Pasi Dumani dhe Hoxhaj mbërrijnë në Fier, Hoxhaj merr dy mjekë për të mjekuar Dumanin, kurse ky i fundit thur planin për t’u dorëzuar duke qenë i bindur se tashmë e kishin tradhtuar. Në këtë moment policia shkon në katin e katërt të banesës dhe kryen arrestimin e Dumanin.