Kryebashkiakja e Durrësit, Emirjana Sako, ka ankimuar vendimin e Komisionit Shtetëror të Zgjedhjeve për dënimin e saj me 100 mijë lekë gjobë për shkelje të ligjit zgjedhor, pasi përdori ambientet e një shkolle të qytetit për organizim të një takimi elektoral të PS-së.
Dënimi i kryebashkiakes erdhi pas denoncimit që bëri organizata “Qëndresa Qytetare”, e cila kishte parashtruar shkeljet e bëra nga Sako dhe përfaqësues të tjerë të administratës publike.
Në ankimimin e depozituar në KAS, Sako kërkon që gjoba të hiqet dhe sqaron se zhvillimi i takimit elektoral nuk është zhvilluar në ambientet e shkollës, por në një shesh aty afër.
Ajo sqaron se takimi elektoral në fshatin Amarth ishte planifikuar të zhvillohej në qendër të fshatit, por u spostua në mënyrë emergjente për shkak të kushteve të motit dhe shiut të cilët kishin krijuar një terren të rënduar në vendin ku do të mbahej fillimisht.
