LIGJET E BIZNESIT
Rusia është mëse e gatshme të përdorë armë bërthamore për t’i dhënë një fund katastrofik pushtimit të saj në Ukrainë, paralajmëroi mbrëmjen e kaluar Volodymyr Zelensky – teksa i kërkoi botës të ‘përgatitet’ për më të keqen duke grumbulluar ilaçe kundër rrezatimit dhe duke ndërtuar streha për sulmet ajrore.
Ish-aktori, tanimë lider ukrainas në kohë lufte, i bëri paralajmërimin e fundit botës gjatë një interviste me median kombëtare, përpara se të ndante klipin përmes rrjeteve sociale.
Ai bëri një njoftim pothuajse të ngjashëm ditën e premte, kur tha se nuk mund të përjashtohej që diktatori i dëshpëruar rus Vladimir Putin do të përdorte armët taktike, pasi lufta e tij kundër Ukrainës vijon të ngecë.
I forti i Rusisë e përforcoi ofensivën e tij ditën e sotme, duke u hakmarrë ndaj Ukrainës për fundosjen e anijes së tij luftarake Moskva të enjten, duke bombarduar pa mëshirë tetë qytetet duke përfshirë Kievin, Kharkivin dhe Lviv.
Në të njëjtën kohë, një luftëtar i dytë britanik u shfaq në televizion pasi u kap nga forcat ruse në Mariupol, teksa Rusia humbi gjeneralin e saj të tetë të lartë në goditjen e fundit në luftën e dështuar të Putinit.
Kjo vjen pasi zëdhënësi i Kremlinit Dmitry Peskov tha se Moska do të përdorte një armë bërthamore në Ukrainë në rastin e një “kërcënimi ekzistencial”.
Zelensky tha: “Ne nuk duhet të presim momentin kur Rusia vendos të përdorë armë bërthamore… Ne duhet të përgatitemi për këtë.”
