Bënte namin me vjedhje, arrestohet “skifteri” 16-vjeçar në Tiranë

Një adoleshent është vënë në prangat e policisë së Tiranës, pasi akuzohet për një sërë vjedhjesh të ndodhura në disa biznese. 16-vjeçari sipas policisë ka kryer 9 vjedhje të dokumentuara dhe po punohet për zbardhjen e rasteve të tjera.

Shtetasi me iniciale O. H., kryente vjedhje në biznese në zona të ndryshme të Tiranës. Adoleshenti ishte bërë makth i bizneseve pasi gjatë orëve të vona të natës ai dilte i maskuar dhe kryente grabitjet pranë arkave të tyre.

Njoftimi Policisë:

Shërbimet e Komisariatit të Policisë Nr. 4, në vijim të punës për parandalimin e vjedhjeve, zbardhjen e atyre të ndodhura më parë dhe vënien e autorëve para përgjegjësisë ligjore, pas një pune të mirëfilltë hetimore, organizuan dhe finalizuan me sukses operacionin policor të koduar “The last”, në kuadër të të cilit u vu në pranga shtetasi:

– O. H., 16 vjeç, për veprën penale “Vjedhja”.

Ky shtetas, në kohë dhe vende të ndryshme, gjatë orëve të vona të natës, kryente vjedhje në biznese në zona të ndryshme të Tiranës.

Nga tërësia e veprimeve hetimore të kryera, dyshohet se në kohë e vende të ndryshme, 16-vjeçari ka kryer një sërë vjedhjesh, ku 9 prej tyre janë zbardhur e dokumentuar me prova ligjore.

Prej muajit shkurt 2022 deri mbrëmjen e djeshme, që u kap në flagrancë pas një jave ndjekje nga shërbimet e Seksionit të Hetimit të Krimeve të Komisariatit të Policisë Nr. 4, ky shtetas, ka vjedhur në 6 markete, në një magazinë, në një automjet dhe në një banesë,  sende të ndryshme dhe shuma parash”, thuhet në njoftimin e policisë.