Zv.ministrja e bujqësisë: Do ndalojmë tregtimin e shpendëve në mjedise të hapura të pamiratuara

Zv.ministrja e bujqësisë Ermira Gjeci tha se në 24 orët e fundit në vend nuk është regjistruar asnjë vatër re me gripin e shpendëve.

“Janë kryer rregullisht kontrolle në të gjithë territorin e vendit dhe nuk janë konstatuar shkelje. Është miratuar urdhri dje për marrjen e masave kufizuese për parandalimin dhe kontrollin e sëmundjes në mjediset e hapura dhe tregjet e kafshëve të gjalla. Po vijojmë bashkëpunimin për marrjen e masave për ndalimin e tregtimit të shpendëve të gjallë në mjedise të hapura të pamiratuara për shitjen e tyre, përfshirjen e trupës veterinare në rritjen e vigjilencës. Nuk kemi asnjë rast të ri të regjistruar”, tha zv.ministrja.

Ajo shtoi se procesi i eliminimit të shpendëve të infektuar do të zgjasë të paktën edhe 5 deri në 6 ditë, pasi është procedurë që kërkon kujdes.

“Procesi është i gjatë, ka ende kafshë të gjalla që kanë destinacion eliminimin e tyre dhe procedura kërkon që ato të eliminohen gradualisht. Është një proces që mund të shkojë nga 5 deri në 6 ditë. Për vatrat e tjera bëj me dije që janë të pastruara, janë në numër të vogël të ngordhjeve. Janë ferma të vogla apo shpendët e oborrit që duhet të bëjnë dezinfektimit.

Do bëhet hetim epidemiologjik që do shohë si ka evoluar sëmundja dhe më pas do dilet në një konkluzion. Prioritet është shuarja e vatrave të ndalojmë përhapjen e sëmundjes në vatrat e tjera. Ky është fokusi, por situata është në monitorim të vazhdueshëm. Është një proces që do zgjasë dhe do vazhdojmë deri në momentin që do garantojmë që sëmundja është zhdukur”, përfundoi zv.ministrja.