LIGJET E BIZNESIT
Kryetari i Komanduar i Partisë Demokratike Enkelejd Alibeaj e quajti skandaloz vendimin e Gjykatës së Tiranës që njohu Kuvendin e 11 Dhjetorit të mbajtur nga ish-kryeministri Sali Berisha.
Ai tha se ky vendim do të ankimohet, pasi gjyqtari nuk ka patur një dosje dhe mori vendim pa prova.
“PD ka bërë ankim për regjistrimin e Kuvendit të datës 18 Dhjetor. Çështja është në Apel bashkë me gjithë dosjen, gjyqtari i sotëm s’ka pasur një dosje, ka marrë një vendim pa pasur prova, dosje”, tha Alibeaj i cili paralajmëroi kallëzim penal për gjyqtarin që dha vendimin e sotëm për njohjen e Kuvendit të 11 Dhjetorit.
“Edhe kur nuk zbardhet brenda afatit 15 ditor ke te drejtë të paraqesësh ankim. Ne do të paraqesim një ankim. Një vendim gjykatë bëhet i ekzekutueshëm, ose kur nuk ankimohet, ose kur ankimohet dhe gjykata e Apelit e shqyrton. Kuvendi i datës 18 dhjetor, ne kemi paraqitur ankim në Gjykatën e Apelit të presim gjykatën e Apelit. Kjo pasi ne kërkuam një bashkim të dy Kuvendeve. Ne bëmë kërkesë për të qenë palë në proces, ato krijojnë vendime që janë nul. Çdokush ka të drejtë që të ankimoj. Sot flasim për një çështje juridike. Bashkimi është një akt politik, kemi ecur me hapa konkrete. Basha ka bërë aktin e vet edhe nga pala tjetër të bëhet në mënyrë simetrike edhe nga pala tjetër. Për një vendim që nuk e kemi parë ende, kemi të drejtën që të bëjmë ankim. Kemi të drejtë për të qenë palë, na e ka mohuar gjykata”, u shpreh Alibeaj.
