Policia shqiptare ka arrestuar një 32-vjeçar sapo ka zbritur në aeroportin e Rinasit.
I riu ishte person në kërkim, dhe aksioni u ndërmor pas indikacioneve që u morën prej autoriteteve gjermane.
32-vjeçari u prezantua në Rinas me një pasaportë false si shtetas ukrainas me moshë dhe identitet tjetër.
“Bazuar në informacionet e siguruara, shtetasi R. F., 31 vjeç, i cili kishte udhëtuar në drejtim të vendit tonë me linjë ajrore, është shoqëruar dhe i është nënshtruar një verifikimi më të detajuar. Gjatë veprimeve ka rezultuar se ky shtetas, dokumentin e identifikimit që i kishte paraqitur punonjësve të Policisë Kufitare Rinas, e kishte të falsifikuar. Nga verifikimi i detajuar ka rezultuar se bëhej fjalë për shtetasin S. D., 32 vjeç, me shtetësi gjermane, i cili për të shmangur identifikimin e tij, ka paraqitur një pasaportë false me identitetin e një shtetasi nga Ukraina”, tha policia.
NJOFTIMI ZYRTAR I POLICISE
Finalizohet operacioni policor i koduar “Terminali”, për kapjen e personave të shpallur në kërkim ndërkombëtar.
Operacioni nga Njësia Speciale Fast Albania, në bashkëpunim me Komisariatin e Policisë Kufitare Rinas, Interpol Tirana, DVP Tiranë dhe autoritetet ligjzbatuese gjermane.
Në vijim të punës për kapjen e personave në kërkim ndërkombëtar, nga Njësia Speciale Fast Albania në Drejtorinë e Përgjithshme të Policisë së Shtetit, falë koordinimit të informacionit me homologët e Njësisë Enfast, në bashkëpunim me Komisariatin e Policisë Kufitare Rinas, Interpol Tirana dhe DVP Tiranë, është bërë e mundur kapja e një personi të shpallur në kërkim ndërkombëtar.
Bazuar në informacionet e siguruara, shtetasi R. F., 31 vjeç, i cili kishte udhëtuar në drejtim të vendit tonë me linjë ajrore, është shoqëruar dhe i është nënshtruar një verifikimi më të detajuar. Gjatë veprimeve ka rezultuar se ky shtetas, dokumentin e identifikimit që i kishte paraqitur punonjësve të Policisë Kufitare Rinas, e kishte të falsifikuar.
Nga verifikimi i detajuar ka rezultuar se bëhej fjalë për shtetasin S. D., 32 vjeç, me shtetësi gjermane, i cili për të shmangur identifikimin e tij, ka paraqitur një pasaportë false me identitetin e një shtetasi nga Ukraina.
Shtetasi S. D., 32 vjeç, është shpallur në kërkim ndërkombëtar, pasi Gjykata e Stuttgartit, Gjermani, ka lëshuar urdhër arrestin ndërkombëtar për veprën penale “Shkelja e ligjit mbi drogat”, parashikuar nga Kodi Penal i Gjermanisë.
Në përfundim të veprimeve procedurale u bë arrestimi në flagrancë i shtetasit S. D., për veprën penale “Falsifikimi i leternjoftimeve, i pasaportave ose i vizave” dhe materialet i kaluan Prokurorisë, për veprime të mëtejshme.
Ndërkohë, Interpol Tirana, në bashkëpunim me autoritetet ligjzbatuese gjermane, vijon procedurat për ekstradimin e këtij shtetasi drejt Gjermanisë.
