“Të përgatitemi për çdo skenar” Lufta në Ukrainë, Rama zbardh vendimin që ka marrë

Në konferencën që po mban mëngjesin e sotëm, kryeministri Edi Rama ka njoftuar ngritjen e një Komiteti Special.

Sipas tij, kjo  do të shërbejë për të menaxhuar pasojat e luftës në Ukrainë në vendin tonë dhe impaktin që do të ketë në ekonomi.

Rama shtoi se askush nuk e di sa do të zgjasë kjo luftë dhe jemi në njëjtat kushte si në kohën e pandemisë.

“Nuk ka asnjë ndryshim tjetër. Dua ta theksoj shumë qartë edhe njëherë. Çmimi i naftës nuk varet nga qeveria. Nuk është qeveria në tregun e lirë që ngre çmime apo i ul ato. Është tregu.

Europa ka hyrë në luftë. Ushtarakisht lufta zhvillohet mes një agresori dhe një vendi nën agresion dhe të gjitha aspektet e tjera ku aspekti ekonomik është themelori. Duhet të jemi të vetëdijshëm se në luftë nuk ka mundësi për të kërkuar të njëjtat gjëra që kërkonim para fillimit të luftës. Duhet të përgatitemi për çdo skenar. Askush nuk e di sa do zgjasë kjo luftë.

Jemi në të njëjtat kushte të të panjohurës si në luftën tjetër me pandeminë ku nuk e dinim kohëzgjatjen dhe dinamikën dhe u përgatitëm. Kemi vendosur të ngremë komitetin special. Dhe jemi ulur që në ditën e parë të kësaj katastrofe për të përgatitur skenarët”, tha Rama.