“Shqiptarët e bashkuar rrëzuan diktaturën” Flet aktori Florjan Binaj: Ne protestojmë, Rama në Dubai

Vijon protesta para Kryeministrisë, ku qytetarë të ndryshëm janë mbledhur kundër rritjes së çmimeve.

I pranishëm është dhe aktori Florian Binaj, i cili tha se nuk ulen çmimet duke pirë kafe, duke ironizuar ata që nuk i janë bashkuar protestës. Ai theksoi se shqiptarët duhet të bashkohen për të ulur taksat, duke kujtuar se ata rrëzuan diktaturën kur u bashkuan.

“Nuk ulen çmimet duke bërë buzët e duke blerë klikime në Instagram. I them të rinjve që është Shqipëria atdheu juaj dhe jo Instagrami.”-tha Binaj.

Aktori ironizoi gjithashtu Bashën dhe Ramën, njëri që thotë se s’ka humbur asnjë betejë dhe tjetri i cili shprehet se nuk i ka rritur taksat.

“Shqiptarët rrëzuan diktaturën kur u ngritën të gjithë bashkë. Po të çohemi të gjithë, jo vetëm ulim taksat por marrim dhe atë që na takon si qytetarë.”-tha Binaj.

Sakaq, aktori Binaj tha se lideri i ballkazanit është në Dubai ndërsa qytetarët po protestojnë.

“Ndërkohë që në Ukrainë ka luftë dhe po vriten përditë, Presidenti i Ukrainës u jep shpresë dhe zemër, ky i joni thotë shtrëngoni dhëmbët.”-tha Binaj.