Gjykata e Tiranës ka dhënë masën e sigurisë “Arrest me Burg” për ish-efektivin e policisë në Dibër, Arbër Sula.
Ai akuzohet se ka vrarë Jurgen Dukën, ngjarje kjo e ndodhur më 14 dhjetor të vitit të kaluar.
Ndërkohë gjatë dëshmisë së tij, Sula ka deklaruar se nuk e njihte viktimën dhe se e ka qëlluar për shkak të panikut..
Efektivi u vetëdorëzua në Komisariatin Nr. 2 të Tiranës, dhe pretendon se një veprim të tillë e ndërmori pas komunikimeve të vazhdueshme me familjen, ndërsa këtë të fundit, forcat e rendit e kishin kontaktuar shpesh për ta bindur Sulën të vetëdorëzohej.
Sula qëlloi mbi Dukën me armën e shërbimit, teksa ishte jashtë orarit zyrtar të punës dhe i veshur civil. Ngjarja ndodhi në një market në rrugën “Irfan Tomini” dhjetorin e kaluar, pas futjes në orarin policor të ndaluar për qarkullim.
Gjykata e Rrethit Gjyqësor Tiranë, kishte caktuar ndaj tij masën e sigurisë “Arrest në burg” në mungesë. Ish-punonjësi i Policisë ka dorëzuar armën e shërbimit me të cilën kreu krimin, së bashku me municionin luftarak, të cilat u sekuestruan në cilësinë e provës materiale.
