Bashkëshortja e presidentit Volodymyr Zelensky, Zonja e Parë e Ukrainës Olena Zelensky ka shpërndarë disa pamje drithëruese nga ajo që po ndodh në vendin e saj pas bombardimeve ruse.
Në pamjet shihen gratë me fëmijët teksa strehohen nëpër bodrume, duke përgatitur koktej molotovi e në një sekuencë të shkurtër edhe bashkëshorti i saj, i cili kishte publikuar një video nga qendra e Kievit.
Ajo shprehet se s’do të dorëzohen, teksa i drejtohet botës, duke thënë se ukrainasit janë duke luftuar edhe për paqen nëpër shtetet e tjera
“Kjo është një video për ta parë bota – ne jemi në luftë. Për shkak të sulmit të Putinit, ukrainasit duhet t’i marrin fëmijët e tyre nëpër bodrume çdo natë dhe të luftojnë armikun nën muret e shtëpive të tyre. Ukraina është një vend paqësor. Ne jemi kundër luftës dhe nuk kemi sulmuar të parët. Por ne nuk do të dorëzohemi. E gjithë bota, shikoni: ne po luftojmë për paqen edhe në vendet tuaja”, ka shkruar bashkëshortja e Zelenskyt, Olena.
Kur u pyet për familjen e tij, Zelenskyy konfirmoi se nuk e kishte parë gruan e tij Olena dhe dy fëmijët e tij për tre ditë.
Luftimet në Ukrainë janë futur në ditën e shtatë të tyre. Që nga fillimi i luftës në Ukrainë janë vrarë 136 civilë mes të cilëve 13 fëmijë. BBC shkruan se shifrat janë bërë publike nga Kombet e Bashkuara.
View this post on Instagram
