“Inkurajojmë të bëhen hetime të shpejta” Deputeti Bllako para drejtësisë, flet ministri Ulsi Manja

Ministri i Drejtësisë Ulsi Manja është pyetur sot nga gazetarët për deputetin e Partisë Socialiste Alqi Bllako, të cilin SPAK ka kërkuar ta arrestojë.

Sipas Manjës, qendrimi i qeverisë dhe PS është i qartë, kush shkel ligjin duhet të mbajë përgjegjësi individuale.

Në një komunikim për mediat, pas mbledhjes së qeverisë, Manja u shpreh se inkurajon drejtësinë që të kryejë hetime të shpejta dhe në interes të publikut.

Çështja e Bllakos, tha Manja është një çështje që i takon drejtësisë, për të cilën kjo qeveri është investuar.

“Qëndrimi i qeverisë dhe i PS sa herë ka të bëjë me çështjet e drejtësisë ka qenë i qarte. Çështjet e drejtësisë janë të drejtësisë. Ne inkurajojmë drejtësinë për hetime të shpejta dhe objektive për çështje sensitive që i përgjigjen interesit publik

Ne kemi ndërmarrë një nga kryereformat, që është ajo në drejtësi.

Ne kemi qenë të bindur kur e kemi ndërmarrë këtë reformën në drejtësi. Kjo ishte aspirata e 99% të shqiptarëve.

Qëndrimi jonë është i qartë, çështjet e drejtësisë i takojnë drejtësisë. Kushdo që shkel ligjin përgjegjësia është individuale”, u shpreh Manja.