I hapet rruga arrestimit/ Nikolla i shkruan kreut të SPAK: Bllako nuk ka më mandat

I hapet rruga arrestimit të deputetit të PS Alqi Bllako, i cili dorëzoi sot mandatin. Kryetarja e Kuvendit Lindita Nikolla i ka shkruar kreut të SPAK Arben Kraja ku e njofton se Bllako nuk ka më mandat, sipas balkanweb. Ajo njofton SPAK se kërkesa për dhënien e autorizimit për arrestim, relacionit shoqërues dhe aktet bashkëlidhur (dy volume), kopjet e tyre janë vënë në dispozicion z.Alqi Bllako.

Fillimisht Nikolla anuloi një mbledhje të Këshillit të Mandateve dhe Imuniteteve pas dorëzimit nga Bllako të mandatit.

Por më pas 5 deputetë të PD kërkuan mbledhjen e Këshillit, ndërsa Nikolla u përgjigj se nuk ka më çështje. Deputetët e PD, anëtarë të Këshillit zhvilluan këtë mbledhje të vetëm dhe sipas tyre nëse nuk respektohet procedura nga Këshilli, mandati konsiderohet jo i mbaruar.