Zhvillimet më të fundit në Ukrainë janë komentuar dhe nga analisti Ilir Kalemaj.
Ai theksoi se një pjesë e oligarkëve po dalin kundër luftës së presidentit të Rusisë Vladimir Putin, duke shtuar se ajo i ka kushtuar vendit 7 miliardë dollarë, për 7 ditë.
“3 për qind të oligarkëve kontrollojnë më shumë se 90 për qind të aseteve. Tani ky rreth oligarkësh po del kundër luftës dhe Putinit. Shërbimet inteligjente e kanë gënjyer Putinin, duke i thënë se ukrainasit do ta mikëprisnin popullin vëlla rus. Ata nuk prisnin vullnetin e popullit ukrainas, shkalla e gjerë ushtarake dhe lidershipi ukrainas. Deri tani lufta ka kushtuar 7 miliardë dollarë, për 7 ditë. Amortizimi i ushtrisë ruse ka kushtuar”, tha ai
Ilir Kalemaj tha se Putini ka frikë nga ndonjë puç i brendshëm, ndërsa shtoi se shefi i Kremlinit i ka djegur tanimë kartat e fundit që ka pasur në dorë.
“Askush s’e imagjinonte që sanksionet do ishin kaq të forta, kaq të shpejta, dhe me këtë efekt. 65 për qind ka rënë rubla ruse, ka çuar inflacionin në shkallë të paimagjinueshme. Kompanitë e mëdha franceze, gjermane, amerikane, po i shesin aksionet dhe po ikin nga Rusia. Putini ka frikë nga ndonjë puç i brendshëm, grusht shteti. Një nga drejtuesit e Partisë Republikane i bëri thirrje ushtrisë ruse të vrasë Putinin. Situata është kritike, Putini ka djegur edhe kartat e fundit që ka pasur në dorë. Putini po censuron çdo lloj zëri, madje po arreston edhe fëmijë”, u shpreh ai.
