“A do jepni dorëheqjen?” Basha i bindur: Unë nuk kam humbur asnjë garë në jetën time

Pas disavantazhit të thellë që ka në rezultatet e deritanishme të zgjedhjeve të pjesshme lokale, kryetari i Partisë Demokratike Lulzim Basha ka folur për herë të parë për mediat.

Ai u shpreh se qytetarët e braktisën procesin e votimit, duke e cilësuar kështu 6 marsin si anomalinë e anomalive.

Sipas Bashës, shumica e qytetarëve që nuk kanë votuar kanë qenë mbështetës të PD.

“Me mospjesëmarrje të madhe votues të mitë, e braktisën se nuk kishte asnjë garanci shtesë. S’jam këtu për të debatuar me ju. E ka sqaruar Tabaku dje se aleanca e non gratave kërcënoi komisionerët vendas. Ne kemi denoncuar në SPAK 3 denoncime për Shkodrën, Dibrën dhe Rrogozhinën. Pra njerëzit e kuptojnë mirë që republika ka arritur në një pikë të papranueshme, e tregoi me mospjesëmarrje dhe elektorati. Na takon edhe ne të bëjmë reflektim të thellë”,-tha Basha.

Por ajo që çuditi më shumë se pretendimi që të gjithë ata që nuk votuan ishin pro PD-së, ishte përgjigja që kryetari i Partisë Demokratike dha kur u pyet nëse do të jepte dorëheqjen pasi po humbet edhe Shkodrën. Plot siguri, Basha tha se nuk ka humbur asnjë garë në jetën e tij.