LIGJET E BIZNESIT
Mbrëmjen e kaluar, Seksioni për Krimin Ekonomik në Tiranë ka arrestuar bashkëpunëtoren e dy kamerunasve të prangosur më herët, 40-vjeçaren nga Zvicra Xheni Chollet. Policia ka zbuluar po ashtu edhe skemën e mashtrimit që do të kryenin 3 shtetasit e huaj të arrestuar.
Mësohet se rol kryesor ka pasur 45-vjeçari Zinedin Nkeh. Fillimisht ai i kishte thënë mikut të tij të arrestuar në datë 17, Josoue Ngankam që të merrte valixhen me para dhe do takoheshin në Shqipëri.
Kamerunasi Zinedin Nkeh kishte dhjetë ditë që kishte ardhur në vendin tonë në mënyrë tranzite. Në datën 13 shkurt rezultoi se ai ishte nisur me linjën Paris-Stamboll, Stamboll-Podgoricë dhe nga Podgorica kishte hyrë në territorin shqiptar në rrugë tokësore me taksi.
Sakaq 40-vjeçarja zvicerane e arrestuar mbrëmë kishte rreth 2 vite që jetonte në Shqipëri pa pasur leje qëndrimi apo leje pune. Ajo prezantohej në vendin tonë si agjente imobilare dhe se bashkëpunonte me një shoqatë të huaj.
Në sajë të hetimeve, policia ka dyshime se shuma prej 100 mijë eurosh e falsifikuar do të përdorej për blerje prone, duke mashtruar një biznesmen.
Gjatë arrestimit të Zinedin Nkeh, iu gjetën edhe disa solicione të cilat ai i përdorte për të hequr bojën e zezë tek paratë, në mënyrë që të mos kuptoheshin që ishin të falsifikuara.
