Rusia ka hapur disa fronte gjatë sulmit në shkallë të gjerë ndaj Ukrainës.
Informacionet raportohen nga mediat ndërkombëtare.
Mësohet se frontet kryesore jannë ato në veri të Kievit si edhe në rajonin Kherson.
Në këtë të fundit rusët kanë mundur të futen përmes Krimesë, ndërsa BBC raporton se tani ushtria ruse synon të ruajë pozicionin në aeroportin e Hostemelit, përmes të cilit më pas të rinisë një sulm ndaj Kievit, objektivi kryesor i tyre.
Pas bombardimit me raketa, rusët kryen një sulm me helikopterë ndaj këtij aeroporti, i cili risolli në vëmendje pamjet e filmave me luftë, veç se kësaj radhe me pasoja të rënda, siç është humbja e jetës së civilëve dhe ushtarëve.
Ndërkohë që helikopterët e Rusisë fluturojnë mbi Ukrainë, ushtria vendase është përpjekur të mbrohet me raketa tokë-ajër duke qëlluar ndaj helikopterëve. Sipas raportimeve zyrtare, deri më tani janë rrëzuar shtatë avionë të ndryshëm, shtatë helikoterë, 24 tanke dhe 20 autoblinda.
Gjatë orëve të fundit në rrjetet sociale dhe mediat ndërkombëtare janë publikuar pamje të helikopterëve rus të rrëzuar pranë Kievit, ndërsa në disa rajone janë parë edhe tanke ruse të shkatërruar.
Në mediat pro ruse janë publikuar pamje të ushtarëve të kapur rob në rajonet lindore si edhe një avion transporti ukrainas i rrëzuar.
