Gjyqtari Ardian Hajdari, anëtar i Kolegjit të Posaçëm të Apelimit është pezulluar nga detyra pasi u mor i pandehur nga SPAK.
Institucioni i lartë i drejtësisë e vuri nën hetim duke i komunikuar akuzat për fshehje të ardhurash dhe deklarim të rremë pasurie. Hajdari është kallëzuar penalisht në qershor 2020 nga ish-magjistratët Antoneta Sevdari, Elsion Sadiku dhe Ervin Metalla.
Njoftimi i Kolegjit të Posaçëm të Apelimit:
Pas vënies në dijeni për marrjen në cilësinë e të pandehurit të gjyqtarit Ardian Hajdari nga Prokuroria e Posaçme kundër Korrupsionit dhe Krimit të Organizuar, në Kolegjin e Posaçëm të Apelimit u zhvillua më datë 07.02.2022, Mbledhja e Gjyqtarëve, e cila me vendimin nr.13, datë 07.02.2022, në mbështetje të nenit C, pika 3 e Aneksit të Kushtetutës, të nenit 128, pika 3, germa ‘b’, të nenit 179, pika 7, si dhe të nenit 179/b, pikat 5 dhe 6 të Kushtetutës së Republikës së Shqipërisë, vendosi:
- Pezullimin nga detyra të gjyqtarit të Kolegjit të Posaçëm të Apelimit, z. Ardian Hajdari.
Ky vendim hyn në fuqi menjëherë.
Kush e paditi dhe deklarimet zyrtare të gjyqtarit:
Anëtari i shkallës së dytë të vetingut, akuzohet nga SPAK për fshehje të të ardhurave tatimore dhe mos deklarim pasurie në ILKDPI gjatë ushtrimit të detyrës së avokatit. Ardian Hajdari është anëtari i dytë pas Luan Dacit që vihet nën akuzë nga SPAK, i cili u shkarkua nga detyra pas dënimit me formë të prerë për ‘falsifikim dokumentesh’.
Ky zhvillim e kompromenton procesin e vetingut pasi vendimet e KPA merren nga një trupë prej tre gjyqtarësh dhe shpesh këto vendime nuk kanë qenë me votë unanime.
Anëtari i KPA, Hajdari u kallëzua në SPAK në qershor 2020 nga ish-gjyqtarë dhe ish-prokurorë që nuk kaluan procesin e vetingun. Ish-prokuroria Antoneta Sevdari, ish-gjyqtari Ervin Metalla dhe ish-prokurori Elsion Sadiku e kallëzuan për falsifikim dokumentesh përveç fshehjes dhe mos deklarim të pasurisë.
Në janar 2020, ishte anëtari i Këshillit të Lartë të Prokurorisë, Besnik Cani që kallëzoi pranë SPAK, dy gjyqtarët e Kolegjit të Posaçëm të Apelimit, Ardian Hajdari dhe Luan Daci. Sipas tij, Hajdari dhe Daci nuk përmbushin kushtet ligjore, përkatësisht; gjyqtari Hajdari nuk ka notën mesatare 8 të kërkuar nga ligji, ndërsa gjyqtari Daci ka fshehur shkarkimin e tij në vitin 1997.
Ish-prokurorja Sevdari paraqiti dhe një ankesë pranë Operacionit Ndërkombëtar i Monitorimit (ONM) për Hajdarin, por që nuk u mor parasysh. Sipas saj, Hajdari nuk plotëson tre kushtet kryesore që përcakton Kushtetuta për të qenë pjesë e KPA. Servdari thotë se Ardian Hajdari nuk ka një eksperiencë prej 15 vite në sistemin e drejtësisë pasi ishte i regjistruar si avokat në Këshillin Rajonal të Avokatëve të Shkodrës për vetëm 13 vite. Gjithashtu, ajo pretendon se Hajdari nuk ka asnjë dëshmi për ndonjë biznes të regjistruar, gjë që do të thotë se ka fshehur të ardhurat nga organet tatimore. Sevdari më tej thekson se Hajdari nuk kishte notën mesatare jo më pak se 8, pasi në diplomën për drejtësi ka mesatare 6.44, ndërsa master nuk ka kryer asnjëherë.
