Sistemi i taksimit është një nga debatet më të nxehta në ekonomi. Ndër vite, qeveria ka propozuar uljne ose heqjen e TVSH në disa sektorë, si dhe subvencione të tjera. Por a kanë dhënë avantazhe në vite këto lehtësira?
Sipas drejtorit të politikave fiskale në Ministrinë e Financave, Niko Lera, i ftuar në A2 Business me gazetaren Aurora Sulçe, “qeveritë fitojnë votat dhe paraqesin programet, ku janë edhe taksat. Është e drejta jonë si vend sovran të gjykojmë për incentivat për sektore të veçanta që rrisin ekonominë e vendit. Edhe ne si çdo vend tjetër kemi incentivuar disa sektorë. FMN nuk ka dhënë ultimatum, ka bërë disa kritika, ne i respektojmë këto sugjerime, natyrisht do të ketë një plan afatgjatë për implementimin e tyre”.
Lera jep edhe disa shembuj. “Ulja e tatimit për vlerën e shtuar në shërbimin e akomodimit, nuk ka ndikuar në rritjen e turizmit? Qytetarët kanë paguar më pak dhe qarkullimi nga ky biznes është rritur me 35%, ka ardhur nga ulja e TVSH dhe investime të tjera, por ka ndihmuar patjetër. Do të ishin më komod ë shqiptarët po të kishin 20% kosto më të lartë në kohë pandemie? Ne nuk jemi Gjermania, ku edhe ulja me 1% ndihet. Në vendin tonë, nivele të tilla nuk garantojnë çmime më të ulta”.
Por sipas Flobenc Dilaverit, ish-zëvendësdrejtorit të përgjithshëm i Tatimeve, ky impakt nuk është reflektuar aspak. “Nuk ka dhënë impakt, por ka rritur informalitetin. Para se të jemi ekspertë jemi klientë, në asnjë rast nuk është reflektuar ulja e TVSH në çmimet e akomodimit në Shqipëri, madje çmimet janë rritur. Nuk kemi as rritje të deklarimit të hotelerisë sepse meraku është që ata nuk duan të paguajnë tatim fitimin. Ndërkohë, informaliteti në këtë sektor, ishte shqetësim dhe ata morën një aksion. Kështu që o gënjen Lera ose Ministrja e Financave”.
Referimi për Lerën nxehu debatin në studio, me akuza që shkuan në personale. “Ti merr rrogën për të gënjyer, Niko, me thuaj një hotel që ka ulur çmimet, nuk më mban njeri në ministri se lyej me bojë eprorët e mi”, janë fjalët me të cilat Dilaveri i drejtohet Lerës pasi ai e kishte akuzuar se nuk ishte në dijeni të shifrave, ndërkohë që Lera i kundërpërgjigjet që me parti është marrë dikush tjetër.A2
