Pas akuzave të liderit të Partisë Demokratike Lulzim Basha se kandidatët e ish-kryeministrit Sali Berisha për zgjedhjet vendore të 6 marsit janë të presidentit Ilir Meta dhe Lëvizjes Socialiste për Integrim, ka ardhur dhe reagimi i kësaj force politike.
Gjatë një deklarate për mediat, LSI thotë se distancohet dhe nuk ka asnjë rol në luftën e brendshme që deputeti Basha ka nisur ndaj liderit historik të PD si dhe ndaj deputetëve, drejtuesve e anëtarëve të PD, që kanë votuar shkarkimin e tij.
Sipas saj, luftra të tilla përçarëse brenda opozitës, i shërbejnë vetëm Ramës.
“Deputeti Basha nuk është opozitar i vërtetë, dhe nuk ka asnjë lidhje me opozitarët e vërtetë, brenda apo jashtë Partisë Demokratike. LSI e ka bërë kryetar bashkie në 2011 deputetin Basha, e më parë Ministër në qeverisjen e suksesshme PD-LSI 2009-2013. LSI i ofroi bashkëpunim pa kushte deputetit Basha në opozitën 2017-2021.Nëse ai do t’i qëndronte fjalës me LSI dhe demokratët e protestave më madhështore që ka njohur Shqipëria, sot ai do të ishte kryeministër”.
Sipas LSI, deputetit Basha nuk i intereson largimi i Ramës.
“Sot interesi i vetëm i tij është të ketë një vulë, që përmes saj të vazhdojë ashtu siç ka bërë para dhe gjatë 25 Prillit, të firmosë marrëveshje financiare me Kryeministrin Rama.LSI do të vazhdojë të paraqitet para shqiptarëve si një opozitë e vërtetë. Për të gjithë ata qytetarë, të majtë, të qendrës, demokratë apo pa parti, që shohin se si lidershipi i tyre ka tradhëtuar kauzat kombëtare për të pasuruar veten dhe bashkëpunëtoret pranë tyre”.
LSI thekson se bashkë me PDK i kanë mundësuar anën formale kandidatëve të Komisionit të Rithemelimit të PD, për tu regjistruar në zgjedhjet e 6 Marsit.
“Kandidatët e Shtëpisë së Lirisë janë kandidatë të Komisionit të Rithemelimit, të zgjedhur nga vetë anëtarët e PD përmes primareve të zhvilluara në partinë e tyre.Demokracia është garë dhe qytetarët meritojnë alternativa të vërteta ndaj qeverisjes, jo kandidatë fallco për një garë me rezultate të paracaktuara, si ajo e 25 prillit. Si në 25 Prill, ashtu dhe në 6 Mars, një gjë mbetet e sigurtë: Një votë për Bashën, është një votë për Ramën Kryeministër që mban me bukë Bashën në opozitë”.
