Viti 2022 nis me bilancin e frikshëm, 6 aksidente e 9 të plagosur në pak orë

Viti 2022 nisi me një bilanc  të rëndë për Shqipërinë. Në vetëm pak orë u shënuan 6 akisdente ku u plagosën nëntë persona, mes tyre edhe një vajzë 5-vjeçare.

Në fshatin Rrile të Lezhës rreth orës 13:30 shoferi humbi kontrollin e makinës që drejtonte dhe për pasojë përfundoi në kanal. Ai u plagos rëndë, ndërsa ndodhet në spital nën kujdesin e mjekëve.

Pas një ore, dy makina u përplasën duke përfshirë dhe një të tretë në aksin rrugor Fushë Krujë-Thumanë, ku e plagosur mbeti njëra nga pasagjeret në mjetet e përfshira, e cila mori ndihmën mjekësore në spital.

Pak orë më vonë, në aksin rrugor Fier-Lushnjë një parakalim i gabuar shkaktoi plagosjen e tre personave në vendin “Mbikalimi i Savrës”.

Në orën 18:30 të mbrëmjes së dy janarit, në aksin Vlorë-Fier  në nënkalimin e Novoselës, dy makina u përplasën kokë më kokë me njëra-tjetrën, ndërsa mbeti e plagosur një pasagjere. Makina e tretë për te shmangur shtypjen e njerëzve që ishin në rrugë, ka devijuar dhe më pas është përplasur me trafik ndarësen.

Shkak i aksidentit ishte manovra e gabuar e makinës “Benz” duke ecur indietro në autostradë.

Sakaq, në Durrës tre makina u përfshinë në aksident dhe e plagosur mbeti edhe njëra prej pasagjereve.

Afërsisht rreth orës 21:15 një tjetër aksident u shënua në Sarandë ku një mjet doli nga rruga dhe për pasojë u plagos një grua së bashku me të bijën vetëm 5 vjeç.